Oondgebakte vis in geurige tamatiesous

Vars vis is altyd my eerste keuse as dit by vis kom, maar as dit nie beskikbaar is nie, is daar wonderlike en maklike etes wat met gevriesde vis gemaak kan word. In dié resep word porsies vis in ’n tuisgemaakte tamatiesous in die oond gebak en daar is geen ander geurmiddels nodig nie – koningskos. Hierdie geurige tamatiesous is maklik om in grootmaat te kook en sommer genoeg te hê om vir ’n volgende ete te vries. Gebruik dit as pastasous, met mieliepap en braaivleis of maak hoenderporsies daarin gaar, soos met die vis in hierdie resep. Of panbraai ’n paar hoenderfilette tot dit net gaar is. Skep van die sous oor, sprinkel met parmesaan-, pecorino- of mozzarellakaas en smelt dit vir ’n paar minute onder ’n warm oondroosterelement.

Vir hierdie resep kan die vis net so gevries gebruik word. Wanneer bevrore vis wel eers moet ontdooi, is dit altyd beter om dit oornag in die yskas te laat ontdooi en nooit in die mikrogolf nie. Die vis ontdooi nooit eweredig in die mikrogolf nie en gedeeltes kan dalk begin gaar word, terwyl ander nog gevries is. Teen die tyd dat die vis dan volgends die resep gaargemaak is, kan dit uitgedroog en smakeloos voorkom. Hierdie resep was deel van die artikel wat ek vir LiG Tydskrif se April-uitgawe gedeel het. Die idee kom oorspronklik uit my resepteboek Maak vyf, en dis so maklik en lekker, dat dit beslis ‘n gunsteling in my gesin is.

Resep

Oondgebakte vis in ’n geurige tamatiesous

Resep uit Maak vyf
Lewer 8 porsies

Bestanddele

Sous

15 ml (1 e) olyf- of avokado-olie

2 uie, gekap

2 knoffelhuisies, gekneus

15 ml (1 e) gerasperde vars gemmer

2,5 ml (½ t) vinkelsaad (opsioneel)

2 wortels, grof gerasper

2 x 410 g-blikke gekapte of heel, geskilde tamaties

30 ml (2 e) gedroogde gemengde kruie of origanum

75 ml (5 e) gekapte vars kruie van jou keuse soos Italiaanse pietersielie of origanum

1 lourierblaar

15 ml (1 e) balsamiese asyn

10 ml (2 t) sagte bruinsuiker

suurlemoensap, sout en varsgemaalde swartpeper na smaak

Vis

ongeveer 900 g-1 kg bevrore stokvisporsies

10 ml (2 t) olyf- of avokado-olie

’n handvol vars Italiaanse pietersielie- en origanumblare en suurlemoenwiggies om mee voor te

Metode

1. Sous: Verhit die olie oor matige hitte in ’n kastrol (bv. ’n AMC 20 cm Gourmet Low of High) en soteer die uie en knoffel tot sag. Voeg die gemmer, vinkelsaad (opsioneel) en wortels by en soteer vir nog ’n paar minute.
2. Roer die tamaties, gedroogde en vars kruie, lourierblaar, asyn en suiker by. Prut oor ’n lae hitte, sonder ’n deksel, vir 20-30 minute of tot die sous effens verdik het en geurig is. Geur na smaak en verpulp met ’n stokmenger.
3. Vis: Voorverhit die oond tot 200 °C. Skep ’n laag van die warm sous in ’n oondbak.
4. Plaas die bevrore vis in die sous en geur na smaak. Skink die olie oor die vis en skep die orige sous eweredig bo-oor.
5. Rooster vir 35-40 minute of tot die vis net gaar is en maklik met ’n vurk vlok. Moenie die vis te lank gaarmaak nie – dan sal dit droog wees.
6. Sit die vis en sous met vars kruie, ’n groen groente en stysel van jou keuse, soos koeskoes met suurlemoen, kruie en olyfolie gegeur, voor.

Wenke

1. Porsies vars lynvis of klein heel sardyne kan in plaas van bevrore vis gebruik word. Vars vis sal vinniger rooster, so kyk na 20-25 minute of dit al gaar is.
2. Gebruik die basiese tamatiesous ook om hoenderporsies of frikadelle in gaar te maak. Of maak Chilli con carne of Basic mince mixture met die sous, deur die blikkie tamatie, uie en selfs wortel, met die voorbereide sous te vervang.