Tuisgemaak is die beste
Almal het van tyd tot tyd lus vir ’n peuselhappie, maar dis ook dikwels een van die struikelblokke vir ’n gesonde leefstyl. As jy self iets voorberei, weet jy presies wat in die happies en jou kos is. Slim kombinasies van geure en teksture is genoeg om dit ekstra lekker te maak, sonder dat jy die oormatig baie sout en suiker wat dikwels in gekoopte happies wegkruip, sal mis.

Maklik, vinnig en gesond
Met ’n paar bekende en alledaagse bestanddele, soos hawermout kan jy ’n smullekker verskeidenheid van happies moeiteloos voorberei. In die twee happies word hawermout, grondboontjiebotter, kakao, eiers, rosyntjies en neute veelsydiger as wat jy dink. Kombineer dit met speserye soos kaneel, gemengde speserye of neutmuskaat. Selfs geurmiddels soos klapper, kakao en vanieljegeursel maak dit ekstra interessant. Seisoenvrugte is ’n gesonde peuselhappie op hul eie, maar net so ideaal om in dié resepte te gebruik. Onthou, dit wat jy op jou inkopielysie sit, is wat jy gaan eet, so hou dit gesond.

Laat die kinders sommer met die resepte help – dis ’n wonderlike manier om hulle aan te moedig om gesonde peuselhappies te geniet.

Resepte

Glutenvrye peuselblokkies

Maak 16 blokkies

Bestanddele

500 ml (2 k) gewone rou hawermout

80 ml (80 g) sagte botter

80 ml (⅓ k) grondboontjiebotter (verkieslik met geen bygevoegde sout of suiker)

30 ml (2 e) sagte bruinsuiker

1 eier, geklits

5 ml (1 t) gemaalde kaneel

2,5 ml (½ t) gemaalde wonderpeper of nog kaneel

7,5 ml (½ e) vanieljegeursel

80 ml (⅓ k) rosyntjies of rooibosbessies (cranberries)

Metode

1. Voorverhit die oond tot 180 °C. Voer ’n klein bakplaatjie (ongeveer 18 x 18 cm) met bakpapier uit.
2. Plaas helfte van die hawermout in ’n bak en meng met ’n stokmenger tot ’n meel.
3. Klits die res van die bestanddele, behalwe die rosyntjies en hawermout saam. Klits die gemaalde en gewone hawermout by tot ’n deeg vorm. Roer die rosyntjies of bosbessies by.
4. Druk die deeg in ’n eweredige laag in die bakplaatjie. Bak vir 15-20 minute tot goudbruin en gaar.
5. Sny dit dadelik in blokkies terwyl dit nog warm is. Laat effens afkoel en plaas dan op ’n afkoelrakkie om heeltemal af te koel. Bêre in ’n lugdigte houer vir 3-5 dae.

Hierdie Peuselhappies was deel van ‘n kos-artikel in LiG Tydskrif, Herfs 2023.
Fotos: Adel Ferreira Photography.