Subscribe for more recipes

Enter your email address to subscribe to this blog and receive notifications of new posts by email.

Eenvoudige tamatiesous met variasies

Nov 23, 2020 | Sauces

Pasta word hoofsaaklik met twee tipes pastasouse voorgesit – souse met ’n tamatiebasis en dié met ’n olie- of roombasis. Hierdie basiese tamatiesous is regtig geurig en perfek om ’n blitsvinnige ete mee te maak.

Dis ook só veelsydig, want byna enige ander bestanddele kan bygeroer word. Jy kan selfs die sous verpulp vir ’n gladder weergawe as party gesinslede nie van die growwe sous gaan hou nie. Kies ’n proteïen, nog groente, kruie en ander geurmiddels soos olywe om by te voeg. Sien die wenke onderaan die resep vir nog idees. Op die foto word dit met pasta voorgesit, maar die basiese sous is ewe lekker net so met vis, vleis of selfs mieliepap met braaivleis.

Drie bestanddele wat natuurlik sinoniem is met pasta is olyfolie, swartpeper en kaas – veral ’n harde kaas soos pecorino-, parmesaankaas of beleë wit cheddarkaas, wat aan tafel bo-oor gerasper word.

Resep
Eenvoudige tamatiesous met variasies
Lewer 4 porsies
Bestanddele
​30 ml (2 e) olyfolie

1 groot ui, fyn gekap

1-2 knoffelhuisies, fyn gedruk

1 rooi soetrissie, ontpit en in blokkies gesny

200 g kersietamaties, gehalveer

1 x 410 g-blik gekapte tamaties

30-45 ml (2-3 e) gekapte vars gemengde kruie, bv. basiliekruidblare, origanum, tiemie en Italiaanse pietersielie

suurlemoensap, sout en peper

Metode
1. Verhit helfte van die olyfolie oor matige hitte in ’n groot pan. Soteer die ui, knoffel en soetrissie tot dit sag is.

2. Roer die kersietamaties by en soteer vir ’n paar minute tot dit geurig is.

3. Voeg die res van die bestanddele, behalwe die olyfolie, by en bring tot kookpunt. Roer af en toe, verlaag hitte en prut sonder die deksel vir 15-20 minute of tot die sous verdik.

4. Roer orige olyfolie by en geur na smaak. Die sous is genoeg vir 250 g rou pasta, soos fusilli, penne of enige pasta van jou keuse. Meng die sous met die warm pasta. In die foto hierbo is gebraaide spek, kaasskaafsels en ekstra vars kruie bygeroer.

Wenke
1. Berei dubbel soveel sous en vries helfte vir ’n volgende ete. Kies enige proteïen of ander groente, soos sampioene of spinasie om by te roer. Salami, ham, chorizo-worsies, gaar hoender, bees-of lamsvleis of tuna is alles heerlik met tamatie.

2. Geur die sous met olywe of ’n fyngekapte brandrissie vir ekstra byt.

In September 2020 was hierdie deel van ’n artikel oor pasta in LiG Tydskrif.
Foto: Adel Ferreira Photography

Pin It on Pinterest

Share This