Subscribe for more recipes

Enter your email address to subscribe to this blog and receive notifications of new posts by email.

Oondgeroosterde sampioene

Mar 23, 2018 | Kosblik 101 / Lunch boxes, Light meals, Sides & salads, Vegetable side

Kosblik 101

Spyskaart
Oondgeroosterde sampioene

Eenvoud is die vreugde van die lewe, so het Koos du Plessis gedig, en dis net so waar as mens oor kos gesels. Die lekkerste kombinasie van bestanddele is soms die eenvoudigste. As mens eers weet watter bestanddele perfekte pasmaats is, is helfte van die werk in die kombuis reeds gedoen.

’n Verskeidenheid sampioene wat vinnig teen ’n hoë temperatuur gerooster word, beklemtoon die natuurlike geur van die sampioene baie goed. As die sampioene met ’n gesonde en geurige olie, sout en peper en vars tiemie gegeur word, het jy regtig nie veel meer nodig nie. Maak seker dat die sampioene nie te lank rooster nie, sodat hulle net gaar, maar steeds sappig is.

Die geroosterde sampioene is ook baie veelsydig, want dit kan op gebraaide vleis, as deel van ’n slaai, of dan soos hier, vir ’n voorgereg of bygereg gebruik word. Die langnaweek is om die draai, en hierdie is ’n ideale resep om as deel van jou spyskaart te beplan. Wanneer baie familie en vriende saam kuier en mens iets spesiaal wil voorsit, wil jy nie noodwendig ure in die kombuis spandeer nie. ’n Interessante gereg wat jy self gemaak het, smaak ook beslis lekkerder as net nog iets wat voorafberei is en van ’n winkelrak of -yskas kom.

Ek is dol oor vars kruie en gebruik dit graag saam met suurlemoen en ander vars bestanddele as geurmiddels. Sampioene pas by ’n wye verskeidenheid geure, van kruie tot brandrissie, gemmer en speserye. Komyn is een van my groot gunstelinge en so lekker met sampioene, soos wat ek in die pateeresep ’n week of wat gelede gebruik het. Sampioene kan rou of gaar gebruik word en as die regte gaarmaakmetode die natuurlike geure nog meer na vore bring, het jy ook nie baie ander elemente nodig om dit suksesvol voor te sit nie.

Vir die televisie-insetsel In&Uit Kosblik gesels ek graag oor maklike en lekker maniere om ook gesond te eet. Dit is regtig nie moeilik of duur nie en mens kan met alledaagse bestanddele wonderlike geregte optower. Eksperimenteer met geurkombinasies wat goed werk om ’n smullekker bord kos te berei en gebruik beproefde resepte as riglyn as jy nie self kreatief kan of wil wees met bestanddele nie. Hierdie resep van vandag kom uit my resepteboek, Maak vyf, waar ek juis probeer om te wys watter geure en bestanddele, met watter gaarmaakmetodes gekombineer kan word, vir die lekkerste smake.

In Pharma Dynamics se resepteboekreeks, Cooking from the heart word daar ook hoofsaaklik van natuurlike geurmiddels gebruik gemaak om ’n verskeidenheid resepte voor te berei. Al hierdie resepte het ten doen om lekker en gesond te wees. Daar is ook heelwat praktiese inligting oor maniere om sout te verminder, hoe om met minder suiker en versoete te kook en meer gesonde olies in etes in te sluit.

Vir die resep hier onder, het ek van Indezi River Creamery se sagte bokmelkkaas met die sampioene voorgesit. Hierdie kaas het ’n baie subtiele smaak en is glad nie oorheersend, soos baie ander bokmelkprodukte nie. Indezi River Creamery doen baie moeite om seker te maak dat hul produkte van die beste gehalte is en iets wat die hele gesin kan geniet. Die kaas komplimenteer die geroosterde sampioene baie goed en daar is niks meer as net ’n draai swartpeper nodig om dit ’n heerlike gereg te maak nie. Daar is van Indezi se ander produkte (sien die wenke hier onder) wat ook lekker sal wees met die sampioene, maar die bokmelkkaas is beslis my eerste keuse. Probeer gerus ook ’n keer hul ongegeurde bokmelkjogurt met die sampioene of kies dan ’n geurige kaas uit die reeks wat die sampioene se geur sal aanvul.

Die kruie waarmee die sampioene gerooster word, is vars tiemie en alhoewel mens soms gedroogde kruie gebruik, is vars altyd die lekkerste. Tiemie se subtiele geur pas by ‘n groot variasie van bestanddele, van vleis en hoender tot vis en groente. Die stingels van tiemie is redelik stewig, maar word sag genoeg waneer dit gaar word, dat dit nie altyd nodig is om die blare af te stroop nie. Soos vir vandag se resep, word takkies tiemie in die resep aangedui. Die woord wat die ATKV hierdie week borg, is ‘takkies tiemie’ en verwys na ’n stukkie stingel met die blare.

Die ATKV is trots Suid-Afrikaans én Afrikaans en wil ons almal ook entoesiasties hou oor ons mooi taal. Deur op verskillende maniere en met ‘n wye verskeidenheid van projekte betrokke te wees, help hulle om Afrikaans lewendig en hedendaags te hou.

Sommer net ‘n praktiese wenk, as jy wel die blare van tiemietakkies moet afstroop, trek die blare in die teenoorgestelde rigting as wat die groei, met ander woorde van bo na onder. Dis die maklikste manier, anders staan mens die blaartjies een vir een en aftrek.

Resep

Oondgeroosterde sampioene

Resep aangepas uit Maak vyf/Make five
Lewer 4 porsies

Bestanddele

400 g sampioene van jou keuse, soos portabellini-, bruin-, knopie- en baba-knopiesampioene

30 ml (2 e) olyf- of avokado-olie

12-15 takkies vars tiemie

sout en peper

100 g Indezi River Creamery sagte bokmelkkaas

vars tiemieblare om mee voor te sit

2 handevol klein slaaiblare, Italiaanse pietersielieblare, roketblare of basiliekruidblare

Metode

1. Voorverhit oond tot 220 °C. Sny of skeur die sampioene in growwe stukke as dit baie groot is. Klein sampioene kan heel gerooster word.

2. Plaas die sampioene en olie in ’n groot mengbak. Meng liggies deur om die sampioene met olie te bedek. Pak in ’n enkellaag op ’n bakplaat en strooi die tiemie, sout en peper oor.

3. Rooster 8-10 minute of tot die sampioene net gaar, maar nog sappig is. Laat afkoel en sit sampioene met sagte bokmelkkaas, tiemieblaartjies en vars kruie soos roket, basiliekruid en Italiaanse pietersielie of sagte slaaiblare voor.

Wenke

1. Suurlemoensap is ook heerlik met sampioene. Druk ’n skeut sap oor die rou sampioene voor dit gerooster word, of oor die warm sampioene, sodra dit uit die oond kom.

2. As jy nie van bokmelkkaas hou nie, kan jy enige van die koeimelk-kase in die Indezi River Creamery reeks gebruik. Kies ’n geurige kaas soos die Amabutho, (Tilsit-styl) of Kinati (pecorino). Hul ongegeurde bokmelk-jogurt sal ook heerlik met die sampioene wees, sit met lepelsvol voor.

Pin It on Pinterest

Share This