Stiekie-bees met gegeurde rys – dis wegneemkos uit jou eie kombuis en in ‘n ‘kits’ gereed. Die smullekker soet-suur geur met vars gemmer en ‘n bietjie byt is perfek saam met die geurige rys. Die sesamsaad en spinasieblare in die rys is ‘n lekker verrassing en maak van die ete ‘n maaltyd-in-‘n-bakkie.
’n Mieliesop is dikwels ’n dik en romerige wintersop, maar hierdie is ’n ligte, vars weergawe. Dis so geurig en kan as voorgereg of ligte maaltyd voorgesit word. Maak dit meer vullend met iets soos spek of skyfies chorizo as jy wil.
Lekker eet – of soos die Meksikaane sê: Buen provecho!
Die geure, kleure en smake wat met Meksiko vereenselwig word, is opwindend, helder en iets waarvan Suid-Afrikaners baie hou. Heelwat van die bestanddele wat in Meksikaanse geregte gebruik word, is ook tipies aan ons mooi land. Hul koskultuur is vir hulle net so belangrik soos wat dit vir ons is om lekker te eet. En die samesyn om ’n tafel is net so kenmerkend van ’n Meksikaanse ete as ’n hartlike Suid-Afrikaanse ete.