Baie mense is dol oor kaaskoek, maar is huiwerig om dit te maak. ’n Gebakte kaaskoek kan maklik droog wees en die gelatien in ’n yskas-weergawe is ’n bestanddeel waarmee min mense gereeld werk. Hierdie is ’n vinnige (en gesonder) alternatief, met ’n heerlike romerige tekstuur en jou gaste gaan beslis dol wees daaroor. Daar is geen bakwerk of gelatienpoeier ter sprake nie – net grenadella-lekkerte!
O, hoe lekker is dit nie om deur dié poeding se bros deeg tot by die romerige sjokoladesous te skep nie! Die koffie is ’n lekker balans vir die soeter sjokoladesous. Onthou om goeie gehalte koffie en kakao vir die beste geur te gebruik.
Dié gebakte pere is só maklik om te maak en bestaan uit ’n paar eenvoudige bestanddele. Die resultaat is ’n smaak-avontuur. Die subtiele speserygeure is perfek met die gekaramelliseerde smaak van die pere. Sit dit net so voor, of bedien dit met een van die opsies in die resep – die Griekse jogurt is beslis my eerste keuse.
Op ’n koue dag maak die poeding jou hart én maag warm. Die gebakte suurlemoenpoeding met sy soetsuursous onder in die bak is alombekend. My ma, Letteli Nel, het eendag besluit om grenadellapulp by die beslag te roer en wat ’n verrassing! Nou is dit ons ‘onthoukos’, want my kinders vra altyd dat ek die poeding so moet maak.
Beïndruk almal met dié spesiale bessietert. Die delikate broskors is nie moeilik om te maak nie en dit word gevul met ’n tuisgemaakte bakkersvla (crème pâtissière). Die tikkie suurlemoen en vanielje in die bakkersvla en ’n fees van vars bessies, is ongelooflik lekker.