Subscribe for more recipes

Enter your email address to subscribe to this blog and receive notifications of new posts by email.

Eier-pizza met maalvleis

Oct 12, 2018 | Kosblik 101 / Lunch boxes, Light meals, Meat

Kosblik 101

Spyskaart

Eiers, maalvleis, gerasperde kaas en vars tiemie is amper al wat nodig is vir hierdie lekker ete. Die eier word as basis vir ’n pizza-idee gaargemaak en dan word die maalvleis en kaas as bolaag gebruik. En wat is dan nou lekkerder as om Wêreld Eierdag hiermee te vier. Dis wel ook Nasionale Sampioendag, so as daar sampioene in die slaai saam met die eier-pizza is, het jy ’n wonderlike maaltyd wat wag.

Maalvleis is een van daardie uiters veelsydige disse. Dit kan op soveel verskillende maniere gebruik word en vries uitstekend vir ’n volgende ete, so mens kan gerus dubbele hoeveelheid voorberei. In Cooking from the heart se eerste resepteboek is daar ’n geurige maalvleisresep wat ideaal is vir die glutenvrye eier-pizza. Soos met die ander resepte in dié reeks resepteboeke, is daar baie klem gelê op gaarmaakmetodes, vars bestanddele en geurkombinasies om seker te maak dat ’n ete smaaklik is, maar wel ook gesond. Daar word meestal met vars bestanddele gekook en die beginsel om self te kook en nie alles in ’n voorafbereide vorm te koop nie, is reeds ’n gesonder opsie. Pizza is ’n gewilde kitskos of geriefs-ete, maar ongelukkig nie altyd so gesond nie. As jy dus ’n heerlike idee by die huis kan maak, wat ook aansienlik gesonder is, is dit net soveel beter.

Nog iets waarop Cooking from the heart fokus, is dat ons, ons kinders van kleins af moet leer en aanmoedig om gesond te eet. As ons ’n voorbeed vir hulle kan wees, het ons reeds vêr gevorder. As die gesin saam eet, dieselfde kos vir almal gemaak word en dit ook vir almal ’n leefstyl word, is dit beslis iets waaroor jou kinders eendag baie dankbaar gaan wees.

Eiers se vermoë om saam te bind en te stol, is die een groot rede waarom dit vir die idee so suksesvol is. Dit vorm ’n stewig genoeg basis om die maalvleis-bolaag te kan dra. Met ses van Nulaid se ekstra-groot eiers, kan ’n goeie basis vir vier porsies gemaak word. Om seker te maak dat die basis ‘sterk’ genoeg is, word geen water by die eiers geklits nie. Wees ook versigtig om nie te veel sout by die eier te sit nie, want die maalvleis is reeds geurig en die kaas bevat heelwat sout. Eier is ’n baie voedsame bestanddeel en behalwe vir die goeie bron van proteïene, is dit ook hoog in ’n reeks vitamienes, minerale en selfs gesonde olies.

Onthou dat eiers baie sensitief is vir hitte, so die eierlaag moet verkieslik teen ’n matige hitte gaargemaak word, sodat dit geleidelik kan stol, maar nie oorgaar word nie. Die eier word ook nie geroer nie, maar as een enkellaag gaargemaak. Kies die grootte van die pan waarin jy die eier gaarmaak só, dat die basis dik genoeg gaan wees en ’n lekker porsie vir elkeen gaan wees. ’n Pan met ’n stewige basis en goeie hitte-geleiding, werk uitstekend.

Vrugte en groente is ’n belangrike deel van ’n gesonde leefstyl en dit kan op verskillende maniere deel wees van ons etes. ’n Eenvoudige slaai met ’n paar bestanddele is soms al wat nodig is om seker te maak dat dié belangrike groep kosse nie vergete bly nie en dat ’n maaltyd voedsaam en gebalanseerd is. Sampioene is een van die bestanddele wat rou en gaar ewe voedsaam is, so om dit deel te maak van ’n slaai, is maklik en lekker gesond. Vir hierdie ete met die eier-pizza is ’n slaai met sampioene en liggies gaargemaakte broccoli en ’n paar repies pikantrissies sommer ook kleurvol.

Die Power of Pink veldtog, van Mushrooms SA is nog in volle swang. Heel en gesnyde knopiesampioene word in pienk bakkies in Pick n Pay verkoop en vir elke bakkie wat verkoop, word R1 aan Reach for Recovery geskenk. Die veldtog help vroue wat borskankerbehandeling nodig het, maar nie dit self kan bekostig nie. Ek is trots daarop om ’n Power of pink ambassadeur te wees.

Gepraat van maalvleis en kaas. By die ATKV se herskepte Hartenbos oord, is die Na Donker en Koswerf-restaurant nou ’n gewilde plek. Roosterkoeke is een van die nuwe items op dié spyskaart. Het jy al ’n warm roosterkoek met maalvleis en kaas geëet? Dis smullekker. Daar is ’n lang lys van vulsel-opsies vir roosterkoeke by Hartenbos, maar die maalvleis is beslis ’n groot gunsteling. Die Desembervakansie is om die draai en dalk is julle gelukkig genoeg om by ’n ATKV-oord te gaan uitspan. As julle wel by Hartenbos ’n draai gaan maak, loer beslis by Koswerf, met sy heerlike kuieratmosfeer en splinternuwe gebou, in.

Resep

Eier-pizza met maalvleis

Resep aangepas uit Cooking from the heart 1

Lewer 4—6 porsies

Bestanddele

6 ekstra-groot vry-loop Nulaid eiers

sout en varsgemaalde swartpeper na smaak

10 ml (2 t) olyf- of avokado-olie

18-20 vars tiemietakkies

250 ml (1 k) gaar maalvleis, verhit

125 ml (50 g) gerasperde wit cheddarkaas

Metode

1.  Verhit ’n braaipan (bv. ’n AMC 24 cm Chef’s pan) oor ’n matige temperatuur.

2.  Klits die eiers saam en geur na smaak.

3.  Skink die olie in die warm pan en giet die eiermengsel bo-oor. Strooi helfte van die tiemie oor die eier. Laat die eier begin stol, sonder om dit te roer, en lig dan die gaar eier al om die kante met ’n eierspaan, sodat die rou eier onder kan inloop. So vorm ’n soliede eierlaag wat die basis van die ‘pizza’ vorm.

4.  Verlaag die hitte en sit die deksel op. Laat dit vir ’n paar minute gaar stoom, maar moenie dat die eier te gaar of rubberig word nie.

5.  Skep die warm maalvleis bo-op die gaar eier en versprei dit eweredig met ’n lepel.

6.  Sprinkel die kaas bo-oor die maalvleis, verwyder van die hitte en plaas die deksel op. Laat dit vir ’n paar minute staan, sodat die kaas kan smelt.

7.  Sny die eier in wiggies, soos ’n pizza, en garneer met die orige vars tiemietakkies.

8. Sit voor met ’n slaai van slaaiblare, liggies gestoomde broccoli, rou knopiesampioene in dik skywe gesny, repies pikantrissies en ’n skeut suurlemoensap en olyfolie.

Wenke

1. Moenie water by die eiermengsel gooi nie, dit sal verhoed dat die eierlaag stewig genoeg is om die bolaag te ondersteun.

2. Enige anders vulsel kan op die basis gesit word. Die wit cheddar kan met ’n ander kaassoort vervang word.

Pin It on Pinterest

Share This