Subscribe for more recipes

Enter your email address to subscribe to this blog and receive notifications of new posts by email.

Ratatouille met eiers & chorizo

Apr 13, 2018 | Breakfast, Kosblik 101 / Lunch boxes

Kosblik 101

Spyskaart
Ratatouille met eiers en chorizo

Perfek vir ontbyt, ’n ligte aandete of middagete – die keuse is joune. Maak dié ratatouille met chorizo-worsies en bak vir elkeen ’n eier of twee in die warm sous. Die kombinasie van murgpampoentjies, eiervrug, soetrissie en tamatie met vars kruie en ’n skeut suurlemoensap is heerlik. Die paprikageure in die chorizo pas perfek hierby en gee die ratatouille ’n wonderlike smaak.

Berei die sous sommer vooraf en dan is dit vinnig om die eiers daarin te laat prut voor ete. Hou die eiers dop, dat die gele net so ver gaar word soos julle daarvan hou. Maak die sous warm tot dit net liggies prut en maak dan ’n holte vir elke eier in die sous. Prut dit verder met ’n deksel om die eiers egalig, maar vinnig gaar te maak.

Die eiervrug in die mengsel is baie tipies, maar as julle nie van eiervrug hou nie, kan dit met nog murgpampoentjies, uie of sampioene vervang word. Eiervrug hoef nie afgeskil te word voor dit gaargemaak word nie en ek sout dit ook nie soos wat mense destyds gedoen het nie. Die eiervrug wat ons deesdae koop is nog jonk en minder geneig om bitter te wees. Onthou net om die sous te laat prut tot die eiervrug heeltemal gaar is, anders kan dit rubberig voorkom. Die eiervrug gee heerlike tekstuur en volume aan die ratatouille.

Elke week se In & Uit Kosblik-insetsel op kykNET word deur borge ondersteun wat ook passievol is oor my filosofie om gesonde eetgewoontes ’n leefstyl te maak. Een maatskappy wat al vir maande lank deel is hiervan, is Pharma Dynamics. Hulle wil ons almal aanmoedig en dit boonop maklik maak om elke dag gesond te eet en leef. Daar is drie resepteboekies in ’n reeks wat deur hulle en die Hartstigting van SA ontwikkel is. Elke resep het ’n gesonde aanslag en gebruik soveel as moontlik natuurlike en vars bestanddele om gesinsetes mee voor te berei. Die resepteboekies is gratis op hul webwerf beskikbaar en daar is nie net resepte in nie maar heelwat praktiese raad om ’n gesonde leefstyl te volg.

Met Nulaid se eiers het ek oor die laaste paar maande ook al verskeie geregte voorberei. Die verskillende groottes wat beskikbaar is, maak dit lekker veelsydig. Vir iets soos hierdie ratatouille kan jy besluit of dit ’n ligte ete of meer vullende maaltyd moet wees en die grootte eiers dienooreenkomstig kies. Ekstra-groot eiers is ’n goeie opsie, sodat daar genoeg proteïene en ander voedingswaarde in die maaltyd is en Nulaid se vryloop-eiers is ideaal. Hul webwerf het ’n hele rits interessante feite oor eiers – lees gerus meer daar.

Richard Bosman se reeks spesialiteit kouevleis is regtig besonders. Hy doen baie moeite met die hele produksieproses van elke produk – van die manier waarop die varke en beeste behandel en hanteer word, tot die verwerkingsproses. Die verskillende produkte word nog met die hand gemaak en hy maak seker dat elke vleis sy unieke smaak het, deur natuurlike geurmiddels soos bv. vars kruie, speserye en rooiwyn te gebruik. Chorizo is ’n Spaanse worsie en word tipies met paprika gegeur en het klein stukkies vet in. Die vetstukkies is ideaal om in die gaarmaakproses te gebruik, want dis ’n maklike manier om die worsie se geure deur die hele gereg te versprei. Braai die worsies eerste en gebruik dan die olie wat uitbraai om die res van die bestanddele in te soteer. Richard het verskillende tipes chorizo, gaan kyk gerus na sy gereelde blog om meer daaroor te lees

Om mooi en korrekte Afrikaans te praat, is altyd vir my lekker, want ons het so ’n pragtige taal. Dis ’n gewoonte wat ek as kind geleer is en dra dit graag oor na my kinders. Die ATKV borg elke week ’n woord of kos-idee en hulle is op verskillende maniere daarby betrokke om Afrikaans lewendig en interessant te hou, selfs wanneer mens kook. Dié week se woord is eiervrug – inderdaad die mooi Afrikaanse benaming vir eggplant, brinjal of selfs die Franse woord aubergine wat alles redelik algemeen gebruik word. Die naam verwys natuurlik na die vorm van die vrug wat aan ’n eier herinner. Die ATKV is natuurlik ook bekend vir hul landswye vakansieoorde, so loer gerus op hul webwerf hoe pragtig dit daar is, of jy nou wil kamp of in enige van die ander akkommodasie wil bly.

Resep

Ratatouille met eiers en chorizo

Resep aangepas uit Cooking from the heart 1
Lewer 6 porsies

Bestanddele

100-125 g Richard Bosman chorizo, in skyfies gesny

2 uie, gekap

1 rooi of oranje soetrissie, ontpit en gekap

4 murgpampoentjies, in blokkies gesny

1 eiervrug, in blokkies gesny

10 ml (2 t) gedroogde gemengde kruie of roosmaryn

1 x 410 g-blik gekapte tamaties

suurlemoensap en swartpeper na smaak

20 ml (4 t) grofgekapte vars roosmaryn

30 ml (2 e) elk gekapte Italiaanse pietersielie en basiliekruid

6 ekstra-groot Nulaid vryloop-eiers

Metode

1. Verhit ’n groot pan oor matige hitte (bv. ’n AMC 28 cm Chef’s Pan) en braai twee-derdes van die chorizo sonder enige olie vir ’n paar minute. Skep uit. Braai die uie en soetrissie in dieselfde pan tot sag.

2. Voeg die murgpampoentjies, eiervrug en gedroogde kruie of roosmaryn by. Soteer vir ’n paar minute tot die eiervrug begin sag word.

3. Roer die tamaties en gaar chorizo by. Verlaag die hitte en prut sonder ’n deksel vir sowat 15-20 minute, sodat die vloeistof kan indamp.

4. Geur met suurlemoensap, peper, vars roosmaryn en die helfte van die pietersielie en basiliekruid.

5. Maak 6 holtes in die tamatiemengsel. Breek ’n eier in elke holte en plaas die res van die chorizo in die sous.

6. Prut met ’n deksel vir sowat 5-8 minute of tot die eiers so gaar is soos wat julle daarvan hou.

7. Sprinkel die orige vars kruie oor en sit as ligte maaltyd voor.

Wenke

1. Die ratatouille kan ook sonder die eiers as ’n bygereg bedien word.

2. Vars avokadoskyfies sal heerlik wees met die gereg.

3. Berei ’n dubbele resep en vries of gebruik vir ’n ander maaltyd in die week, bv. saam met pasta of as sous met mieliepap en braaivleis. Meng dit met maalvleis en maak ’n herderspastei.

4. Indien basiliekruid nie beskikbaar is nie, gebruik gekapte kruisement of nog pietersielie. Selfs tiemie sal lekker wees saam met die geure in die mengsel.

Pin It on Pinterest

Share This