Botterskorsie-&-bokmelkkaas-slaai

Botterskorsie is een van my gunsteling-groentes. Die lys van redes is lank, maar die veelsydigheid en natuurlike soet smaak staan heel bo aan. In hierdie feestelike slaai dien dit beide as groente en stysel en is heerlik saam met braaivleis, hoender, vis of vark. Bokmelk het ’n effens suur smaak wat net die regte balans het saam met die soet smaak van botterskorsie. Ek geniet die slaai as ’n voorgereg of ligte hoofgereg, maar dis perfek as bykos ook. Die slaaisous kan jy vir enige slaai gebruik, so maak dit sommer dubbeld.

Resep

Botterskorsie-&-bokmelkkaas-slaai

Resep aangepas uit Maak vyf/Make five
Lewer 4 – 6 porsies

Bestanddele

Slaaisous

100 ml olyf- of avokado-olie

45 ml (3 e) balsamiese asyn

sap van 1 lemoen

15 ml (1 e) heuning

sout en peper

Slaai

500 g botterskorsie, geskil en in blokkies gesny

500 g beet, geskil en in wiggies gesny

100-150 g gemengde vars slaaiblare met roket- en klein beetblare

2 sprietuie, in dun skyfies gesny

100 g bokmelkkaas, gekrummel

75 ml (5 e) dukkah (sien wenk)

Metode

1. Slaaisous: Meng al die bestanddele saam en geur na smaak.

2. Slaai: Voorverhit die oond tot 200 °C. Plaas botterskorsie en beet op ’n groot bakplaat en giet ’n derde van die slaaisous oor. Rooster vir 30-40 minute of tot gaar.

3. Sit slaaiblare op ’n groot slaaibord of op individuele slaaiborde en plaas botterskorsie en beet bo-oor met die sprietuie en kaas.

4. Sprinkel met dukkah en sit dadelik voor met die slaaisous. Dit is heerlik warm, maar perfek as bygereg teen kamertemperatuur.

Wenke

1. Gebruik feta, pecorino of ricottakaas in plaas van die bokmelkkaas.

2. Tuisgemaakte dukkah (ongeveer 250 ml): rooster 125 ml (½ k) grofgekapte, ongesoute neute bv. amandels of makadamianeute sonder enige olie, oor matige hitte, in ’n pan (bv. ‘n AMC 28 cm Chef’s Pan) tot goudbruin. Voeg 125 ml (½ k) sesamsaad by en rooster tot goudbruin. Verwyder van die hitte en meng 2,5 ml (½ t) gemaalde kaneel en 1,2 ml (¼ t) gemaalde komyn by. Laat dit afkoel en stoor in ’n glasfles of lugdigte-houer.

3. Vervang die dukkah met gekapte neute van jou keuse of ’n mengsel van neute en sade bv. sesam- of sonneblomsaad.

4. ’n Lekker manier om ’n slaai op ’n warm somersdag vars te hou, is om ’n groot stuk botterpapier (greaseproof paper) op te frommel en onder die kraan papnat te maak. Druk die oortollige water uit en sit die papier direk op die slaai. Die papier sal uitdroog en die slaai vars hou. Jy kan dit weer natmaak as dit nodig is.