Subscribe for more recipes

Enter your email address to subscribe to this blog and receive notifications of new posts by email.

Hoender-en-mieliesop vir die winter

Jun 1, 2018 | Kosblik 101 / Lunch boxes, Mains

Kosblik 101

Spyskaart
Hoender-en-mieliesop vir die winter
JAZZ™ appels

Stomende bakkies sop is só ’n lekker manier om jou innerlike (maag én siel) op ’n koue dag te versterk. Vir my is dit verseker nie net vir siek mense of ’n voorgereg vir ’n ete nie. Daar is fantasiese maniere om ’n vullende en voedsame sop te maak, wat as volledige ete geniet kan word.

Dié hoendersop is vir my gesin ’n genotvolle koesterkos-ete en ek kan dit maar gereeld maak, want almal geniet dit elke keer. Dis ’n uitstekende voorbeeld van ’n maklike gaarmaakmetode wat bydra tot die geurigheid van die sop. Daar word nie aftreksel vir die sop gebruik nie, want die hoenderstukke word in water en geurmiddels geprut om ’n aftrekselbasis vir die sop te vorm. Die res van die bestanddele en geurmiddels is voldoende om ’n baie smaaklike ete te wees.

Het jy al agtergekom hoe dors jy soms na ’n sop-ete kan wees? Dis dikwels omdat die aftreksel wat gebruik word onnodig sout is. Met hierdie resep word daar grootliks van natuurlike geurmiddels gebruik gemaak en die sop sluit feitlik al die voedselgroepe in, so dis ’n maaltyd-in-een en regtig voedsaam.

Die aartappelblokkies help om die sop effens te verdik, maar groente soos patats of botterskorsie kan ook gebruik word. Aartappels vries nie altyd so sukesvol nie, so as jy ’n groot hoeveelheid sop wil maak om ’n gedeelte te vries, is dit raadsaam om een van die ander groentes te gebruik. Die kruie en speserye in die resep gee heelwat geur daaraan en die feit dat die hoender eers verbruin word, dra verder by tot ’n ryk hoendergeur. Suurlemoen is die ander belangrike geurmiddel en onthou, ek noem dit graag, soos uit die Cooking from the heart resepteboeke, die ‘nuwe sout’, omdat dit so ’n effektiewe geurmiddel is – en boonop aansienlik gesonder as sout. Saam met die blikkie suikermielies (wat dikwels sout bevat) is dit nie eers nodig om sout by hierdie sop te voeg nie. Onthou om altyd die etiket van voorafbereide produkte te lees, juis om te weet wat jy in jou etes insluit. Saam met goeie keuses vir bestanddele en gaarmaakmetodes, is dit nog ’n belangrike beginsel van ’n gesonde leefstyl en ’n gewoonte wat ons almal gerus kan aanleer.

Nog ’n praktiese deel van ’n gesonde leefstyl, is om elke dag ten minste vyf vars produkte in jul etes in te sluit. Dit hoef nie alles rou te wees nie, so die groente in die sop is al ’n goeie beginpunt. Om wel ’n paar vars bestanddele in te sluit, bly ook belangrik. Hierdie tyd van die jaar is mens nie altyd meer lus vir ’n slaai nie, so dan is seisoensvrugte dikwels die antwoord. JAZZ™ Appels is nou in seisoen en die perfekte, sappige peuselhappie. Die pikante smaak van die appel is verfrissend en ideaal om enige tyd van die dag te geniet. Maak dit soggens deel van ontbyt met hawermout of muesli, pak dit in ’n kosblik of geniet dit tussen etes. Die appels is ’n goeie bron van vitamienes, minerale en vesel wat dit lekker vullend maak. As my kinders voor ete honger is, sny ek graag vir hulle vars produkte, soos appels, op om sommer solank te geniet.

Koesterkos is vir my ’n pragtige Afrikaanse woord wat so mooi beskryf hoe ’n spesiale bord of bakkie kos jou laat voel – spesiaal en geliefd, of dit roep herinneringe op van iets wat vir jou baie lekker was. Die ATKV doen ook baie moeite om hul gaste spesiaal te laat voel as hulle by een van hul gewilde vakansieoorde kuier. Nie net wat die vermaak en verblyf aan betref nie, maar by hul Koswerf-restaurante wil hulle die hele gesin graag bederf. Daar is heelwat geregte op hul spyskaart wat as koesterkos bestempel kan word. Probeer gerus die pizza met tikkahoender, een van hul spesialiteit-steaks, stiekie hoendervlerkies of dalk peri-peri hoenderlewers vir ’n koue wintersdag.

Resep

Hoender-en-mieliesop vir die winter

Resep aangepas uit Cooking from the heart 1
Lewer 6 – 8 porsies

Bestanddele

2-3 hoenderborsies aan die been, oortollige vet verwyder

15 ml (1 e) olyf- of avokado-olie

2 uie, gekap

1 knoffelhuisie, fyn gekap

2 groot aartappels, geskil en in blokkies gesny

5 ml (1 t) gemaalde komyn

10 ml (2 t) gemaalde koljander

1 liter (4 k) water

30 ml (2 e) gedroogde gemengde kruie

250 ml (1 k) melk

250 ml (1 k) bevrore mielies of 2 heel mielies, gekook en van die stronk afgesny

1 x 410 g-blik suikermielies

suurlemoensap en swartpeper na smaak

45 ml (3 e) elk gekapte vars koljanderblare en Italiaanse pietersielie

Metode

1. Sny hoenderborsies in die helfte met ’n kombuisskêr of skerp mes.Verhit olie in ’n groot kastrol (bv. ’n AMC 24 cm Gourmet High en braai die hoender, uie en knoffel vir ’n paar minute.

2. Voeg aartappels, gemaalde komyn en koljander, water en gedroogde kruie by. Bring tot kookpunt, verlaag die hitte en prut met ’n deksel vir 20-30 minute of tot die hoender net gaar is.

3. Skep hoender uit, ontbeen en verwyder die vel en pluis die hoender.

4. Meng die hoendervleis, melk, mielies en suikermielies by die sop in die kastrol. Verhit oor lae hitte tot deurwarm.

5. Geur met suurlemoensap, peper en die helfte van die vars kruie.

6. Bedien met ’n skeut olyf- of avokado-olie en die orige kruie.

Wenke

1. Sit sop met vars skyfies avokado voor.

2. Ander hoenderporsies soos dye of boudjies kan ook gebruik word.

3. Botterskorsie en patats sal ook lekker wees in die sop, vervang aartappels met enige van die twee.

Pin It on Pinterest

Share This