Subscribe for more recipes

Enter your email address to subscribe to this blog and receive notifications of new posts by email.

Skemerkelkiehappies

Nov 23, 2018 | Light meat, Light vegetarian, Savoury snacks

Kosblik 101

Die feestyd is om die draai en met elke funksie of kuier met familie, vriende en kollegas is daar altyd iets te ete. Dit maak my moedeloos as borde eetgoed uit net nog ’n diepgebraaide happie of nog iets in ’n degie van een of ander aard is. Dan lyk die tamaties of komkommer wat dikwels eintlik die garnering is, sommer ekstra lekker. So as dit my beurt is om eetgoed te maak, kies ek eerste iets wat ook uit vars bestanddele bestaan.

Almal hou van ’n bord vol kleurvolle happies en alhoewel dit tydrowend kan wees, hoef dit nie die geval te wees nie. Hier is twee maklike idees wat jy vooraf kan maak of sit al die elemente op ’n tafel en nooi almal om hul eie happies te ‘bou’. Die murgpampoentjie-plaatkoekies is ’n lekker basis vir interessante bolae en alhoewel dit ook ’n deegbasis het, is dit aansienlik ligter as ’n diepgebraaide happie of byvoorbeeld ’n broskorsdeeg. Die murgpampoentjies dra ook by tot die vesel en voedsaamheid van die happies. Kies ook bolae wat uit gesonde en vars elemente bestaan, om dit ekstra lekker te maak. Op dié manier is al die happies beslis ook nie net verfynde of geprosesseerde kos nie. Onderaan die resepte is daar ook ’n paar ekstra wenke en kyk veral na die maklike manier om seker te maak dat die happies nie op ’n warm dag uitdroog nie.

Die resepte in die drie Cooking from the heart resepteboeke, het heelwat idees wat as skemerhappies gebruik kan word. Hierdie murgpampoentjie-plaatkoekies word met volkoringmeel gemaak, wat beteken dat dit reeds meer veselryk is as ’n ander deeg. Die murgpampoentjies is nie net ’n lekker bestanddeel saam met die elemente wat bo-op gesit word nie, maar dra ook verder by tot die voedsaamheid van die happies. Onthou om dit met die skil te gebruik, sommer ook vir ekstra kleur. Daar is geen bygevoegde sout in die beslag nie, want die kaas en veral die geroosterde sesamsade gee dit reeds genoeg geur. Suurlemoensap is ook ’n ideale geurmiddel. Vars kruie of speserye soos paprika of ’n bietjie neutmuskaat sal ook lekker wees.

Met die kombinasie van eiers en karringmelk is daar genoeg vloeistof in die mengsel en is dit nie nodig om nog olie ook by te sit nie. Net ’n dun lagie olie word gebruik om die plaatkoekies oor ’n matige temparatuur te braai, sodat die happies nie olierig is nie. Eiers is mos een van daardie veelsydige bestanddele wat verskillende funksies in geregte kan vervul en hier is dit belangrik om al die bestanddele saam te bind. Dit dra ook by tot die sagte tekstuur en voedingswaarde van die happies. Nulaid het ’n wye verskeidenheid groottes om van te kies en vir gebak kan groot of ekstra-groot eiers met sukses gebruik word. Maar onthou dat ’n groter eier meer vloeistof tot die resep gaan bydrae, so dis raadsaam om te hou by die grootte wat in ’n resep aangedui word.

Een bestanddeel wat nou in seisoen is, en ewe lekker met soet en sout smake gekombineer kan word, is JOYA® Appels. Vir ’n bord skemerkelkiehappies, kan appels op verskillende maniere gebruik word. Die rooi skil dra by tot die kleure op die bord en dis sommer meer aptytlik as ’n bord happies kleurvol is. Die kaas-en-appelpakkies is so maklik om te maak en lyk pragtig. Appels en kaas is altyd lekker en met die kouevleis en kruie daarby, is dit ’n vinnige gourmet-happie om voor te berei. Appel pas ook baie goed by die neuterige smaak van die tahini en selfs net met maaskaas en vars kruie, is dit reeds ’n wonderlike kombinasie. Die appelpakkies is ook een van die maklike en vinnige idees met dié sappige appels, wat nou op JOYA® Appels se webwerf en sosiale media (@joyaredsa) gebruik word. Gaan kyk gerus wat jy alles met die vrug kan maak. JOYA® Appels is in uitgesoekte PicknPay en Woolworths winkels beskikbaar.

Om te ontspan en met familie en vriende tyd te spandeer, is ’n groot deel van vakansietye en sinoniem met dié tyd van die jaar in Suid-Afrika. Die ATKV se sewe oorde deur die land, is ’n heerlike bestemming vir die hele familie. Daar kan almal ontspan en heerlik kuier. Elke oord het ook ’n Koswerf-restaurant met iets vir elkeen se smaak op die spyskaart. Hartenbos se nuwe restaurant, Na Donker en Koswerf spog ook met ’n interessante verskeidenheid van kuier-geregte. Daar is heerlike knibbelborde op die spyskaart wat ideaal is om tussen ’n klomp mense te deel – of dit nou as skemerkelkiehappies of ’n maaltyd geniet gaan word.

Onthou om altyd genoeg water te drink, of dit op ’n warm dag is, oppad in die kar, met vakansie of by ’n kuiergeleentheid is. Soms is ’n mens eintlik dors en nie net honger nie. Peuselkos en iets soos skemerkelkiehappies kan ’n mens nogal dorser as gewoonlik laat voel. Maak dit sommer ook ’n gesonde gewoonte om saam met ander drankies genoeg water te drink. Dit geld vir drankies met alkohol en dié wat dalk meer versoet is as wat jy besef, soos gaskoeldranke, skemerkelkies of ander mengeldrankies. Halo maak dit gelukkig maklik, want met die kleurvolle bottels in hul reeks, is daar een vir elkeen om van te kies. Die bottels is maklik hervulbaar, van hersirkuleerbare plastiek gemaak en maklik om in te pak en saam met jou te neem. Die bottels is in groot supermarkte beskikbaar, of besoek hul webwerf om te kyk waar jy dit in die hande kan kry.

Resepte

Kaas-en-appelpakkies

Maak ongeveer 12 – 15 pakkies

Bestanddele

1-2 JOYA® Appels, in die skil, in dun wiggies gesny

80 g Boerenkaas of beleë cheddarkaas, in dik skywe gesny

mikrokruie of klein roketblare

80-100 g kouevleis, soos swartwoudham, Parma-ham of prosciutto

Metode

1. Maak klein bondeltjies met 2-3 appelwiggies, ’n kaasskyf en van die kruie of roketblare.

2. Sny of vou die kouevleis in dunner repe en bind elke appel-en-kaasbondeltjie met ’n repie vleis “vas”. Steek met ’n tandestokkie vas, indien nodig.

3. Geniet as ’n versnapering of as deel van ’n bord met skemerkelkiehappies.

Wenke

1. Vars kruie soos Italiaanse pietersielie of kruisement kan ook gebruik word in plaas van mikrokruie.

2. Spoel appelwiggies in water af en druk liggies droog met kombuispapier. Dit sal verhoed dat die appel verkleur.

Murgpampoentjie-plaatkoekies

Resep aangepas uit Cooking from the heart 2
Lewer ongeveer 35 – 40 klein plaatkoekies

Bestanddele

375 ml (1½ k) volkoringmeel (verkieslik steengemaal)

5 ml (1 t) bakpoeier

250 ml (1 k) karringmelk

2 groot Nulaid eiers, geklits

60 ml (¼ k) sesamsaad, gerooster (sien wenk)

4 murgpampoentjies, grof gerasper

90 ml (6 e) grofgerasperde cheddarkaas

suurlemoensap en swartpeper na smaak

30 ml (2 e) olyf- of avokado-olie vir braai

Bolaag-opsies

200-250 g ongegeurde growwe maaskaas

tahini (sien wenke)

swart of wit sesamsaad

pikantrissies, in repies gesny

kappertjiesaad (capers)

1 JOYA® Appel, met die skil, in kwarte en dan in skyfies gesny

vars kruie soos Italiaanse pietersielie, kruisement of tiemie

Metode

1. Plaas die volkoringmeel en bakpoeier in ’n groot mengbak. Klits die karringmelk en eiers in ’n aparte mengbak saam.

2. Roer die sesamsaad, murgpampoentjie en kaas by die droë bestanddele.

3. Voeg die karringmelkmengsel by die droë bestanddele en roer tot ’n beslag vorm. Geur met bietjie suurlemoensap en peper na smaak.

4. Verhit die helfte van die olie oor ’n matige hitte in ’n groot braaipan (bv. AMC 24 cm Chef’s Pan).

5. Braai lepelsvol (sowat 15 ml) van die mengsel aan beide kante tot goudbruin. Dreineer op kombuispapier.

6. Herhaal met die res van die beslag en nog olie, indien nodig.

7. Bolaag: Rond elke plaatkoekie af met jou keuse van bestanddele. Meng 10 ml tahini met 100 ml van die maaskaas en skep op party plaatkoekies. Skep van die ongegeurde maaskaas of tahini op nog plaatkoekies.

8. Garneer happies met die ander bestanddele en kombineer dit na smaak. Sit as skemerkelkiehappies voor.

Wenke

1. Geroosterde sesamsaad: Rooster die sesamsaad in ’n droë pan oor ’n matige temperatuur vir ’n paar minute tot goudbruin. Hou dit dop, want dit brand baie maklik.

2. Tahini is ’n sesamsaadpasta wat in groot supermarkte of gesondheidswinkels beskikbaar is.

3. Gebruik guacamole as nog ’n opsie om op die plaatkoekies te sit. Dit sal heerlik wees met die ander bolaag-elemente.

4. Geur die plaatkoekie-beslag met paprika, neutmuskaat of vars kruie, na smaak, as jy wil.

5. Om happies vars te hou: maak ’n groot stuk botterpapier (greaseproof paper) deeglik nat met water, druk die oortollige water uit. Sit die papier liggies bo-oor die voorafbereide happies. Die papier sal eerste uitdroog, maar nie die happies nie en die papier kan weer natgemaak word, as dit nodig is – veral op ’n warm dag.

Pin It on Pinterest

Share This