Subscribe for more recipes

Enter your email address to subscribe to this blog and receive notifications of new posts by email.

Kosblik 101

Franse roosterbrood is ’n bekende ontbyt idee, maar dis ewe lekker as ligte ete en boonop kan jy byna enige iets as bolaag daarop eet. Hier is my resep vir dié gereg, met drie idees om dit mee voor te sit: pangebraaide sampioene met maaskaas en roket of kaas, tamatie en vars kruie. En as jy van ’n soeter smakie hou, is daar vars pere met heuning, kaneel en neute.

So eenvoudig soos wat Franse roosterbrood is, kan daar wel ’n paar dinge verkeerd loop, so volg die riglyne in die resep, sodat jy dit elke keer perfek regkry. Een belangrike punt is die soort brood wat jy kies. Behalwe vir die feit dat ’n gesonder keuse met meer vesel en voedingswaarde altyd beter is, is ’n stewiger sny brood makliker om in die eier te laat week en dan te braai. Gebruik verkieslik bruin-of volkoringbrood. Daar moet genoeg eier wees, sodat die brood deeglik deurweek is – een eier per porsie, is ’n goeie basis. Moenie die pan te warm maak nie, want dan brand die brood voor die eier gaar is. ’n Matige hitte is meer as genoeg, want eiers het nie ’n hoë temperatuur nodig om te stol nie. Braai die snye brood ook net in ’n baie dun lagie olie, want anders is die Franse roosterbrood onnodig olierig en dis nogal onaptytlik.

In Pharma Dynamics se reeks resepteboeke, Cooking from the heart se tweede resepteboek is daar ’n hele afdeling met ontbyt-idees en ook ligte etes. Dis juis die etes wat dikwels afgeskeep word, omdat mense nie altyd weet wat hulle nog as ontbyt kan eet, anders as net nog ’n bakkie pap nie. Of te haastig is om iets voedsaam en vullend te maak. Iets soos Franse roosterbrood is ’n redelike vinnige ete om voor te berei en jy kan kies wat jy daarmee saam wil eet. Die Cooking from the heart resepte is almal volgens die basiese gesonde leefstyl-beginsels van die boek geskryf en met iets soos Franse roosterbrood is die keuse van brood en porsiebeheer altyd belangrik. Eiers se voedingswaarde en veral hoë proteïen-inhoud, maak dit ideaal om dié ligte ete voedsaam te maak. Eiers is ook ryk aan vitamiene, minerale, gesonde olies en antioksidante.

Met Nulaid se groot of ekstra-groot eiers kan jy seker wees dat daar ’n goeie porsie eier vir elkeen ingesluit is. Met Franse roosterbrood, word die eiers se uitstekende vermoë om te kan stol, vir die eindresultaat gebruik. Maar eiers is mos een van daardie baie veelsydige bestanddele en dit kan verskillende rolle in geregte vervul. Soms bind dit bestanddele saam, soms gee dit volume en ander kere is dit juis die vermoë om vinnig gaar te word en te stol, wat nodig is.

Die idees vir bolae wat vir Franse roosterbrood gebruik kan word, is eindeloos. Onthou net om dit so gesond as moontlik te hou, sodat die ete steeds voedsaam is. Dit moenie te veel sout bevat nie en ’n tuisgemaakte opsie is altyd beter as net nog iets wat klaargemaak aangekoop word. As jy dit self maak, weet jy mos wat alles in die ete is. Sampioene se natuurlike sout smaak, ook bekend as umami, is perfek vir ’n bolaag. Die sampioene hoef net in ’n pan gebraai te word – en dit het nie eers olie nodig nie. Braai die sampioene oor ’n matige hitte, in sarsies as dit nodig is, en geur met vars suurlemoensap en swartpeper vir ’n baie geurige eindresultaat. Dit is heerlik saam met ’n bietjie maaskaas, of avokado, as jy nie van suiwel hou nie. ’n Paar roketblare daarmee saam, rond dit perfek af.

Onthou dat dit die laaste week van Mushrooms SA se omgee-veldtog, Power of Pink is. Die veldtog se doel is om vrouens met borskanker te ondersteun en veral die vroue, wat nie self die kostes van ’n bors-inplanting kan dra nie. Heel en gesnyde knopiesampioene word in pienk bakkies in Pick n Pay verkoop en vir elke bakkie wat verkoop, word R1 aan Reach for Recovery geskenk. Ek is trots daarop om ’n Power of pink ambassadeur te wees. Koop ’n bakkie of twee, maak jou bydrae om vir ander om te gee en sorg in dieselfde asem vir jou en jou gesin, deur ’n baie voedsame bestanddeel deel te maak van jul etes.

By die ATKV se Koswerf-restaurante kan jy deesdae ook baie lekker gaan eet. Die spyskaart by hul Koswerf-restaurante op die oorde het ’n wye verskeidenheid van resepte wat vir elke ete van die dag en vir die hele gesin bedoel is. Hartenbos se Na Donker en Koswerf-restaurant is ’n splinternuwe ontwikkeling. Tuisgemaakte roosterkoeke is ’n unieke item op hul spyskaart en daar is ’n paar interessante bolaag-opsies om van te kies. Gaan kyk gerus ook op hul Facebook-blad na die vakansieprogram van elke oord, as julle dalk in die vakansie daar gaan kuier.

Resep

Franse roosterbrood

Resep aangepas uit Cooking from the heart 2
Lewer 4 porsies

Bestanddele

4 groot Nulaid eiers

60 ml (¼ k) water

1,2 ml (½ t) sout

swartpeper na smaak

15 ml (1 e) olyf- of avokado-olie

4 snye bruin- of volkoringbrood

Metode

1. Klits die eiers en water saam en geur na smaak. Giet die mengsel in ’n vlak bord of houer.

2. Verhit die helfte van die olie oor ’n matige temperatuur in ’n groot pan (bv. ’n AMC 28 cm Chef’s Pan). Doop die snye brood een vir een, aan beide kante, in die eiermengsel. Moenie die brood te lank in die eiermengsel los nie, want dit sal te pap word.

3. Braai 1-2 snye brood op ’n slag tot gaar en goudbruin aan beide kante.

4. Herhaal die proses met die orige olie, eiermengsel en brood.

5. Sit voor met ’n verskeidenheid bolae. Probeer pangebraaide sampioene (sien wenke) met growwe maaskaas en roketblare of vars kersietamaties met ’n mengsel van gekapte vars kruie en wit cheddarkaas.

6. Dit kan ook met ’n soet bolaag bedien word. Vars pere, ’n drupsel heuning, gemaalde kaneel en gekapte makadamianeute is heerlik.

Wenke

1. Geur die pangebraaide sampioene met suurlemoensap, indien verkies.

2. ’n Knippie gemaalde kaneel of vanieljegeursel kan by die eiermengsel geroer word, as jy die Franse roosterbrood met ’n soet bolaag gaan voorsit.

3. Spek is heerlik saam met Franse roosterbrood, maar dit het ’n hoë sout inhoud. Indien jy spek as bolaag gebruik, moenie sout in die eiermengsel gebruik nie.

4. Gebruik brood wat ’n dag of twee oud is, sodat dit nie te maklik pap word as dit geweek is nie.

Pin It on Pinterest

Share This