Subscribe for more recipes

Enter your email address to subscribe to this blog and receive notifications of new posts by email.

Geroosterde kekerertjies met speserye

Sep 28, 2018 | Kosblik 101 / Lunch boxes, Light meals, Light vegetarian, Mains, Sides & salads, Vegetable side, Vegetarian

Kosblik 101

’n Eenvoudige speserymengsel met ’n skeut suurlemoensap en olie is perfek om kekerertjies in ’n opwindende element te omskep. Die kekerertjies word in dié mengsel gerooster tot dit bros is en dan is dit sommer ekstra veelsydig. Vegetariese etes gebruik gereeld kekerertjies, aangesien dit ’n goeie bron van proteïen en koolhidrate is. Dit het ook die vermoë om ander geure wonderlik te absorbeer en juis daarom is die resep so ideaal.

Maandag is dit Wêreld Vegetariese dag en Internasionale koffiedag – genoeg rede om opgewonde te raak oor dit wat op ons tafels is. Goeie kos, koffie en geselskap is mos van die groot vreugdes in die lewe. Vleislose etes is ook ’n bekende konsep op #In&UitKosblik en nie net as hoofmaaltyd nie, maar ook as ligte ete en natuurlik vir ’n kosblik.

Om vegetaries te eet, is iets wat vir ons almal tot voordeel is, want verskillende bronne van proteïen voorsien ook ander voedingselemente. Dit is ’n goeie idee om ten minste een keer ’n week vegetaries te eet en nie net elke dag vleis as proteïen in te sluit nie. So is eiers bv. ook ryk aan omega olies, vitamiene en minerale. Maar as jy besluit om vegetaries te eet, beteken dit beslis nie net dat jy vleis uitlaat en die groente of slaai aan tafel eet nie. Proteïene bly ’n belangrike kossoort om te eet en ander bronne as vleis, vis of hoender, sluit bestanddele soos eiers, lensies, peule, bone, sade en neute in.

Vir falafels, ’n tipiese Griekse happie, word kekerertjies fyngedruk en met speserye gegeur, soos ’n frikkadel gebraai en met ’n geurige jogurtsous in pitabrode voorgesit word. In Cooking from the heart  se tweede resepteboek val die klem op kosblik-idees, ontbyt en peuselhappies. Een van die resepte wat perfek is vir ’n kosblik, is ’n idee, soortgelyk aan ’n falafel, maar dit is met botterbone gemaak. Vir ’n ander resep in die boek word kekerertjies met geurmiddels gerooster en dan verpulp om as doopsous te gebruik. Die twee idees is so bietjie gekombineer vir vandag se resep – die kekerertjies word gerooster en dan as deel van ’n vegetariese ete gebruik.

Speserye soos komyn, koljander, kaneel en paprika is altyd ’n heerlike kombinasie en ewe lekker met die neuterige smaak van kekerertjies. Rooster dit alles saam vir ’n nog geuriger idee. Die kekerertjies word vir dié ete met ’n gebakte eier, slaaibestanddele en jogurt, wat jy self geur, voorgesit. Met min moeite is ’n gebalanseerde en voedsame maaltyd voorberei en dis selfs ideaal vir ’n kosblik. ’n Gekookte eier gaan dalk makliker vir ’n kosblik werk, maar die voedingswaarde van die ete bly dieselfde.

Gebruik van Nulaid se groot of ekstra-groot eiers, want eiers bly ’n uitstekende bron van proteïen om die ete vullend genoeg te maak. Vir ’n hoofete van die dag, kan twee eiers per person bedien word, maar vir ’n ligter ete is selfs een eier voldoende. Onthou om nooit die pan te warm te maak wanneer eiers gaargemaak word nie, hetsy dit gebak, geroer of as omelet voorberei word. Daar is beslis ’n bietjie olie nodig om te verhoed dat die eier aan die pan vassit, maar moenie die eiers daarin laat ‘swem’ nie – ’n dun lagie is meer as genoeg.

Elkeen het hul voorkeur vir die gaarheid van ’n eier. As jy daarvan hou dat ’n gebakte eier se geel nog loperig is, werk dit uitstekend om die eier vir ’n paar minute te bak en dan die hitte laag te stel of selfs heeltemal af te sit. Sit ’n deksel op en laat dit vir ’n rukkie so staan, sodat die eier nie te vinnig gaar word en die geel te hard is nie. As jy ’n pan soos AMC cookware gebruik, wat die hitte baie goed behou, kan jy beslis die hitte heeltemal afsit om die eier meer geleidelik gaar te maak.

Kies die slaaibestanddele waarvan jy en jou gesin hou, om saam met die eier en kekerertjies voor te sit. Gebruik dit wat in seisoen is en hou dit kleurvol. Met die warmer weer wat ons begin beleef, raak mens beslis meer lus vir ligte etes met slaaibestanddele. Hierdie ete-idee is ideaal, want dis steeds vullend, voedsaam en baie geurig. Maak sommer genoeg van die kekerertjies, want dis net so lekker om met enige ander groen slaai voor te sit of strooi dit oor geroosterde groente vir ekstra geur.

Die ATKV is bekend vir hul vakansieoorde en beslis ook die bydrae wat hulle vir die uitbou van Afrikaans op vele vlakke doen. Met hul Koswerf-restaurante op elke oord, kombineer hulle hierdie twee aspekte uitstekend. Die spyskaarte by Koswerf bied ’n wye verskeidenheid van geregte vir die hele gesin aan en die name en beskrywings van die verskillende disse word ook op ’n kreatiewe manier gedoen. Daar is selfs ’n paar oulike Afrikaanse benamings vir geregte, soos ’n Magrieta-pizza, in plaas daarvan om net weer na die Engelse margherita te verwys.

Die nuutste ATKV-restaurant is Na Donker en Koswerf by Hartenbos met ’n heerlike kuieratmosfeer. Soortgelyke geregte is op hul spyskaart en daar is selfs ’n paar interessanthede, soos tuisgemaakte roosterkoeke met verskillende vulsels en knibbelborde – nog ’n mooie en beskrywende woord. Daar is een met ’n variasie van kaas en koue vleis, of ’n tipiese Suid-Afrikaanse bord met heelwat vleise. Gaan kuier binnekort daar en bestel sommer ’n paar verskillende knibbelborde, waaraan almal kan peusel.

Resep

Geroosterde kekerertjies met speserye

Resep aangepas uit Cooking from the heart 2
Lewer 4 porsies

Bestanddele

Kekerertjies

5 ml (1 t) gemaalde komyn

5 ml (1 t) gemaalde koljander

5 ml (1 t) komynsaad

2,5 ml (½ t) gemaalde kaneel

5 ml (1 t) paprika

30 ml (2 e) olyf- of avokado-olie

10 ml (2 t) fyngerasperde suurlemoenskil

1 x 410 g-blik kekerertjies, gedreineer

Jogurtsous

125 ml (½ k) ongegeurde jogurt

knippie gemaalde komyn

5 ml (1 t) fyngerasperde suurlemoenskil

30 ml (2 e) grofgekapte vars kruie, soos kruisement en koljanderblare

Om mee voor te sit

200 g kersietamaties, gehalveer

½ komkommer, in blokkies gesny

1 rooi soetrissie, ontpit en in klein blokkies gesny

4-6 groot of ekstra-groot Nulaid eiers

2 avokado’s, gehalveer en in dun skyfies gesny

suurlemoenwiggies

Metode

1. Kekerertjies: Voorverhit die oond tot 180 °C en voer ’n bakplaat met bakpapier uit.

2. Druk die kekerertjies droog met kombuispapier – dit maak die roosterproses meer effektief.

3. Meng die speserye, olie en suurlemoenskil saam in ’n mengbak en roer die kekerertjies deur. Skep dit op die bakplaat en versprei eweredig.

4. Rooster vir 20-25 minute of tot bros en goudbruin. Haal uit die oond en laat afkoel.

5. Jogurtsous: Meng al die bestanddele saam. Hou dit eenkant.

6. Meng die tamaties, komkommer en soetrissie saam om as ’n salsa voor te sit.

7. Bak die eiers in ’n pan (bv. ’n AMC 24 cm Chef’s pan) volgens elkeen se smaak.

8. Sit 1-2 eiers per persoon met die geroosterde kekerertjies, jogurtsous, salsa, avokado en suurlemoenwiggies voor.

Wenke

1. ’n Handvol ekstra vars kruie, soos kruisement- en koljanderblare of Italiaanse pietersielie is heerlik met die res van die bestanddele van die gereg.

2. Die geroosterde kekerertjies is heerlik oor enige slaai, sop of geroosterde groente. Bêre in ’n lugdigte houer vir 1-2 dae. Dit sal ’n bietjie sag word, maar rooster dit weer vir ’n paar minute vinnig in ’n warm oond of pan om dit bros te maak.

3. Onthou om nie die vloeistof waarin kekerertjies geblik word, weg te gooi as jy dit gedreineer het nie. Vries dit en gebruik as ‘aftreksel’ vir ’n volgende keer se sop of bredie.

Pin It on Pinterest

Share This