Subscribe for more recipes

Enter your email address to subscribe to this blog and receive notifications of new posts by email.

Blatjanghoender

Aug 31, 2018 | Kosblik 101 / Lunch boxes, Light meals, Mains, Poultry

Kosblik 101

Blatjanghoender is ’n Suid-Afrikaanse gunsteling en vir baie mense deel van hul kos-erfenis. Met ’n handjievol bekende bestanddele, is dit maklik om dié geurige ete op tafel te hê. Hierdie smullekker weergawe is lekker, maar heelwat gesonder as sommige resepte. September is nie net bekend as Erfenismaand nie, maar dis ook as Braaimaand. In die volgende drie weke gaan ek ’n paar gunstelinge deel en gesels oor verskillende maniere om dit net so lekker, maar ook gesonder te maak.

In die eerste Cooking from the heart resepteboek van Pharma Dynamics, is mense juis gevra wat hul gunstelingresep vir ’n gesinsete is en blatjanghoender was hoog op die lys. Ongelukkig is daar ’n paar tipiese bestanddele vir die resep, wat nie altyd ewe gesond is nie. Soppoeier om die sous te verdik, is die eerste sondebok, want dit het ’n baie hoë soutinhoud. Heelwat room word ook dikwels gebruik en verder is die gewoonte om kos-etikette te lees, vir die resep van waarde. Blatjang kan onnodig baie suiker bevat, so doen maar gerus jou leeswerk en kyk hoeveel suiker en preserveermiddels daar in die blatjang is wat jy van die rak afhaal.

Met ’n paar eenvoudige veranderinge, is dit wel moontlik om steeds die groot gunsteling in ’n gesonder formaat voor te sit. Gebruik ongegeurde jogurt in plaas van room, vervang die soppoeier met mielieblom en maak ’n goeie keuse as jy blatjang koop. ’n Paar uiewiggies voeg ekstra geur by en so kan jy met min moeite en gesonder keuses, steeds heerlik smul.

’n Kleurvolle bord kos of kosblik, is nie net meer aptytlik nie, maar beslis propvol voedingswaarde. Elke kleurgroep verteenwoordig ook ’n groep vitamiene, minerale, antioksidante en ander voedingselemente wat alles gereeld deel moet wees van ons etes. Maak die aandete-bord verder vol met ’n verskeidenheid groente en vrugte van jul keuse. Gebruik veral dit wat in seisoen is, vir die meeste geur. Kyk sommer na die foto’s op die blad vir ’n paar idees en sit ’n groot variasie voor. Ryg dit op stokkies om dit makliker te kan inpak vir ’n kosblik en sommer ook die kleiner gesinslede opgewonde te maak oor groente en vrugte. Hulle is dol daaroor om iets van ’n stokkie af te trek en dit so te eet.

Sampioene is ’n heerlike bestanddeel saam met iets soos die blatjanghoender. En jy hoef dit nie noodwendig eers gaar te maak om die gesondheidsvoordele van sampioene te geniet nie. Hierdie bekende kos is ewe gesond vars en rou en onthou om nooit ’n sampioen te was nie, vee dit net met ’n stukkie kombuispapier af. Hul tekstuur is soos die van ’n spons, so dit absorbeer vinnig water en word dan maklik pap. Of as dit gaargemaak word, stoot dit die ekstra vloeistof uit en kan maklik ’n waterige eindresultaat gee, veral as die sampioene in ’n pan gebraai of gerooster word. Lees gerus meer op Mushrooms SA se webwerf oor die verskillende gekweekte sampioene wat algemeen beskikbaar is in ons winkels.

Nog ’n deel van my erfenis, is my taal. Ek is trots daarop om Afrikaans te wees en daar is sulke wonderlike koswoorde in Afrikaans wat ’n mens kan gebruik, soos blatjang, bobotie, sosaties, roosterkoek, lekker, smaaklik en vele meer – alles maniere om kosmaak ook sommer nog meer pret te maak.

Ek het nou al vir ’n geruime tyd die voorreg om by die AKTV se Koswerf-restaurant betrokke te wees en selfs op daardie spyskaart, is daar ’n paar baie mooi Afrikaanse name vir geregte. Gaan kuier beslis ook binnekort by die splinternuwe Koswerf en Na Donker-restaurant op Hartenbos. Die lekker kuierrestaurant se spyskaart sluit onder andere varsgebakte roosterkoeke met ’n verskeidenheid vulsels in. Of bestel ’n knibbelbord vol lekkertes met ’n yskoue drankie en geniet ’n gemaklike ete om ’n tafel met familie en vriende.

Resep

Blatjanghoender

Resep aangepas uit Cooking from the heart 1
Lewer 4 — 6 porsies

Bestanddele

8 hoenderporsies, bv. dye of boudjies, oortollige vet verwyder

10 ml (2 t) mielieblom

125 ml (½ k) sterk Rooibostee

125ml (½ k) blatjang van goeie gehalte

1 groot ui, gehalveer en in dun skyfies gesny

250 ml (1 k) ongegeurde lae-vet jogurt

2,5 ml (½ t) sout

vars tiemieblare (opsioneel)

Metode

1.  Voorverhit die oond tot 180 °C. Plaas die hoenderporsies in ’n oondbak.

2.  Meng die mielieblom met van die tee om ’n pasta te vorm. Meng die res van die tee by.

3. Roer die blatjang en ui by. Voeg die jogurt en sout by en roer tot goed gemeng.

4. Skep die jogurtmengsel eweredig oor die hoenderporsies.

5.  Bak vir 30-45 minute of tot goudbruin en die hoender gaar is.

6.  Garneer met vars tiemie en sit warm saam met slaai of groente van jou keuse as ’n heerlike aandete voor. Pak oorskiet-hoender in ’n kosblik met neute en vars bestanddele soos bv. knopiesampioene, aarbeie, wortels, gaar broccoli en tamaties (sien wenk).

Wenke

1. Kosblik-kebabs: ryg die verskillende vars elemente, soos aarbeie, vars sampioene en tamaties op klein kebabstokkies en pak dit so in vir kinders (of grootmense). Dit help om veral die kinders opgewonde te hou oor vrugte en groente.

2. Rooster stukkies botterskorsie saam met die uie in die oondbak om sommer ook ’n stysel in die ete in te sluit.

Pin It on Pinterest

Share This