Subscribe for more recipes

Enter your email address to subscribe to this blog and receive notifications of new posts by email.

Blomkool-&-appelsop met eiers & avo

Jul 6, 2018 | Kosblik 101 / Lunch boxes, Light meals, Mains

Kosblik 101

Botterskorsiesop is seker een van die bekendste sopresepte. Die manier waarop dit gemaak word, is ook ideaal vir ’n verskeidenheid van ander verpulpte groentesoppe. Blomkool is geen uitsondering nie en met die kombinasie van appels en komyn as geurmiddel, is dit baie interessant. Die sop is baie maklik om te maak en as jy dit dan met ’n geposjeerde eier en avokado voorsit, het jy ’n volledige en voedsame ete. 

In Cooking from the heart se eerste resepteboek, is ’n botterskorsiesop met speserye en appels wat ’n baie lekker geurkombinasie lewer. Probeer gerus hierdie blomkool-weergawe as ’n lekker wintersop. Die aartappel, blomkool en appel gee dit ’n lekker dik tekstuur en die effense soet smaak van die appel is perfek met die blomkool. Die sop word met natuurlike bestanddele voorberei en gegeur en dis ’n belangrike beginsel van ’n gesonde leefstyl, want dan weet jy wat in die kos is wat julle geniet. Ek pes die woord ‘dieet’, maar as ’n mens so lekker kan eet en boonop weet dat jy gesond eet, is die motivering om gereeld so te eet ook sommer makliker. Dit moet ’n leefstyl word en beslis nie ’n straf wees nie. Die hele gesin moet ook lekker én voedsaam eet. 

Sop word so dikwels met brood geëet, maar as jy die bykomstighede vir sop ook voedsaam kan hou, is die ete selfs nog gesonder. Brood kan ’n sop-ete maklik te styselryk maak en dalk juis iets wat jy in die winter wil dophou – hoeveel stysel in etes ingesluit word. 

Die soet smaak en krakerige tekstuur van ’n vars Pink Lady® appel is regtig lekker. Die appels is nou in seisoen en as jy nog nie een van die appels geproe het nie, moet jy dadelik ’n plan maak. Die appels is baie sappig en dra beslis by tot die geurigheid van die sop. Gebruik die appels in die sop met die skil aan, sodat die voedingswaarde daarin, ook deel word van die ete. Beide soet en sout smake pas by  so moenie dalk dink dat dit net ‘n peuselhappie of kosblik-item hoef te wees nie. Ek kook en bak baie graag met dié mooie vrugte. 

’n Sop wat verpulp word, is dikwels romerig genoeg, danksy die tipe groente wat gebruik word. Maar as jy dit nog romeriger wil maak, gebruik baie mense melk, room of ’n ander suiwelproduk. Dit is egter nie die enigste manier om ’n romerige eindresultaat te kry nie. ’n Geposjeerde eier waarvan die geel nog effens loperig is, is ’n wonderlike manier om ’n romerige smaak te gee. En as daar dan nou nog blokkies avokado ook ter sprake is, gaan jy beslis lekker eet. 

Eiers is so ’n veelsydige bestanddeel. Nie net vir die maniere waarop dit gaargemaak kan word en die rol wat dit in verskillende resepte speel nie, maar dis boonop baie voedsaam ook. Dis ’n goeie bron van proteïen, so die sop is wel vegetaries, maar die maaltyd sal vullend genoeg wees. 

Eiers kan bestanddele bind, lug inkorporeer vir ’n ligter eindresultaat, ’n emulsie met ander bestanddele vorm en afhangend van hoe dit gaargemaak word, lewer dit elke keer ’n ander eindresultaat. Nulaid se groot of ekstra-groot eiers werk goed as bykomstigheid vir die sop en is ‘n wonderlike alternatief vir iets soos brood, om die sop-été voedsaam en vullend genoeg te maak. 

Dis avokado-seisoen – iets wat baie mense regtig opgewonde het, want hierdie vrug pas by ’n lang lys van bestanddele. Maar voor jy te opgewonde raak, moet jy nie ’n avokado ‘op sy baadjie takseer’ en ’n fout met die rypheid van ’n avokado maak nie. Daar is hoofsaaklik twee soorte avo’s waarvan ons moet kennis neem. Die donker-skil avo’s het ’n growwe skil en voel altyd hard. Die vrug begin met ’n groen skil en soos dit ryper word, verkleur dit na ’n donker, amper swart skilkleur. Dis die beste manier om te bepaal of dit wel ryp is. Hierdie avokado’s is moeiliker om af te skil en skep makliker met ’n lepel uit die dikker skil. 

Die ander groep, is groen-skil avo’s, wat ’n heelwat dunner skil is en maklik afskil. Hierdie avo verkleur nie, maar as jy die avo saggies in jou hand druk, behoort jy te kan voel of dit effens meegee en wel ryp is. Nog ’n manier om ‘veilig’ te bepaal of die vrug ryp is, is om die stingeltjie wat spesiaal met die plukwerk in die boorde, aan die vrug gelos word, liggies te trek. Sodra die vrug ryp is, trek die stingeltjie baie maklik af. As dit nog stewig sit, los die vrug vir nog ’n dag of wat, want ’n avokado wat nog nie ryp is nie, maar gesny word, word ongelukkig nie verder ryp nie en is ’n skade. https://www.avocado.co.za/ 

Vir die sop, kan die avokado in repies of blokkies gesny en selfs effens fyngedruk word, net soos julle daarvan hou. As ‘n donker-skil avo gebruik word, kan die vleis selfs met gemak met ’n klein lepeltjie uitgeskep word. 

Resep

Blomkool-&-appelsop met geposjeerde eiers & avokado

Resep aangepas uit Cooking from the heart 1
Lewer 6 porsies

Bestanddele

800 g blomkool, met stingels in blommetjies gesny

2 groot aartappels, met die skil in blokkies gesny

2 uie, gekap

2 Pink Lady® appels, met die skil in blokkies gesny

10 ml (2 t) gemaalde neutmuskaat

25 ml (5 t) gemaalde komyn

1,75 liter (7 k) kookwater

125 ml (½ k) melk

suurlemoensap en swartpeper na smaak

2,5-5 ml (½-1 t) sout

45-60 ml (3-4 e) gekapte vars Italiaanse pietersielie

6 groot Nulaid eiers, geposjeer of gebak (sien wenk)

2-3 ryp avokado’s, in blokkies gesny

Pink Lady® appel-tjips, om mee voor te sit (opsioneel)

heel neutmuskaat, gerasper (opsioneel)

Metode

1. Plaas die groente, appels en speserye met die water in ’n groot kastrol (bv. ’n AMC 24 cm Gourmet High).

2. Bring oor matige hitte tot kookpunt. Verlaag die hitte en prut vir 30 minute of tot die groente sag is.

3. Verwyder van die hitte en verpulp die sop met ’n stokmenger of druk met ’n aartappeldrukker fyner.

4. Voeg melk, suurlemoensap, peper, sout en helfte van die Italiaanse pietersielie by. Verhit tot deurwarm.

5. Posjeer of bak die eiers tot so gaar soos verkies. Skep sop in bakkies en plaas ’n eier bo-op sop.

6. Plaas avokado en appeltjips (indien gebruik) ook op die sop en strooi die res van die pietersielie oor. Rasper heel neutmuskaat oor elke sopbakkie en sit dadelik voor.

Wenk

1. Posjeer eiers in warm water of gebruik ’n posjeer-ring of eier-posjeerder, soos wat ek in die insetsel gedoen het. 

Pin It on Pinterest

Share This