Subscribe for more recipes

Enter your email address to subscribe to this blog and receive notifications of new posts by email.

Heuning-&-hawermoutbrood

Jun 22, 2018 | Baking, Kosblik 101 / Lunch boxes

Kosblik 101

Hawermout is een van daardie veelsydige bestanddele wat definitief nie net as ontbytpap gebruik hoef te word nie. In dié broodresep gee die kombinasie van steengemaalde meel, hawermout, karringmelk en ’n skeut heuning ’n wonderlike tekstuur en geur. En as jy dit kan regkry om iets oor te los vir die volgende dag, is die roosterbrood wat jy daarmee kan maak, absoluut heerlik!

Tuisgebakte brood is nie net ’n lekker bederf nie, maar ook ’n heelwat gesonder opsie, want jy weet wat alles in die brood gebruik word. Winkelbrood voel dalk gerieflik, maar dit is dikwels van meer verfynde meel gemaak en hoog in bygevoegde sout of suiker. Sulke brood is dikwels minder vullend en voedsaam as ’n tuisgebakte brood. Die rysmiddel in die resep is bakpoeier, so dis nie nodig om iets te knie nie. As jy dalk skrikkerig is om ’n gisbrood te bak, is hierdie ’n maklike alternatief. Met ’n tuisgebakte brood kan jy selfs kleiner brode bak, om porsiebeheer makliker te maak.

Die brood is perfek om vir toebroodjies te gebruik en in ’n kosblik of vir padkos in te pak. Kies bestanddele vir ’n vulsel wat die broodjies selfs nog voedsamer maak. Vars bestanddele is ’n goeie begin en ’n proteïen soos oorskiet-vleis, vis of kaas is ideaal. Selfs biltong is heerlik, maar kies wel klam biltong wat nie te sout of vetterig is nie. Al hierdie wenke geld ook vir ander peuselhappies, hetsy in ’n kosblik of as dit dalk vir padkos nodig is. Die keuses vir gesonde en gebalanseerde eetgewoontes, is ewe toepaslik vir wanneer jy aan iets wil knibbel.

Pharma dynamics se resepteboeke Cooking from the heart  bevat nie net resepte nie, maar ook heelwat wenke en idees om juis dit maklik te maak. Daar is inligting wat die keuse van bestanddele en gaarmaakmetodes soveel makliker maak en heelwat resepte vir peuselkos. Onthou dat wanneer jy peusel, dit belangrik is om steeds voedsame bestanddele te kies, soos vars vrugte, neute en sade of ander veselryke (verkieslik tuisgemaakte) peuselhappies wat jou langer versadig gaan hou. Hoe langer jy versadig bly, hoe kleiner is die kans dat jy heeltyd wil peusel. Dit geld ook vir ’n kosblik of padkos. Verfynde of versoete eetgoed laat jou beslis gouer honger voel en verder maak dit jou maklik dors. Soms is jy nie eers regtig honger nie, maar inderdaad dors en sonder om dit te besef, sit jy maklik verder en peusel, terwyl ’n paar slukke water dalk die lus kon stil.

Vars seisonale vrugte is ’n wonderlike peuselhappie en iets soos JAZZ™ appels staan juis as ’n perfekte peuselhappie bekend. Dis ’n ideale manier om ’n kosblik of mandjie padkos gebalanseerd te hou. Die appels is propvol geur en so sappig dat dit selfs jou dors kan les. Die veselrykheid en voedingswaarde van die appels is genoeg rede om dit deel te maak van jou dag se etes, ongeag of jy die appel heel eet of as deel van ’n gereg gebruik. Gebruik die soet appels ’n slag as deel van die slaai-elemente vir ’n toebroodjievulsel – dit is heerlik met kaas en komkommer. Sny die appels in wiggies en vou met skyfies komkommer, kaas en selfs biltong in sagte slaaiblare toe. Pak die slaaibondeltjies in ’n houer en geniet dit later tussen twee snye van die hawermoutbrood vir ’n heerlike ete. Die slaaipakkies bly langer vars en as elkeen die vulsel eers later opsit, word die broodjies ook nie so maklik pap nie, want pap toebroodjies is ’n onaptytlike spulletjie.

Padkos is ’n eg Afrikaanse woord en een van my gunstelinge. Dit roep nie net lekker kindertyd-herinneringe op nie, maar is ook moeilik om in Engels te vertaal. Food for the road klink mos nou nie dieselfde as padkos nie. Daar is baie sulke woorde in Afrikaans, wat alles bydra tot die mooi en ryk woordeskat van ons taal. Die ATKV se betrokkenheid by verskeie projekte om Afrikaans te bevorder, speel ’n groot rol om ons taal lewend te hou. Dankie ook vir jul borgskap van In&UitKosblik se woord van die week: hierdie week is dit inderdaad padkos.

Dalk is julle die vakansie met jul padkos oppad na ’n ATKV-oord  Gaan maak dan beslis ’n draai by die Koswerf-restaurant waar julle heerlik kan eet.

Resep

Heuning-en-hawermoutbrood

Resep uit Maak vyf/ Make five
Lewer 1 brood

Bestanddele

625 ml (2 ½ k) broodmeel of steengemaalde broodmeel

250 ml (1 k) rou hawermout

15 ml (1 e) bakpoeier

’n knippie sout

45 ml (3 e) heuning

1 eier

500 ml (2 k) karringmelk

30 ml ( 2 e) geroosterde hawermout (sien wenk)

Metode

1. Voorverhit die oond tot 180 °C. Voer ’n 1,5 liter-broodpan (of twee kleiner broodpanne) met bakpapier uit en smeer deeglik met botter.

2. Meng die droë bestanddele saam in ’n groot mengbak.

3. Klits heuning en eier goed saam en voeg met die karringmelk by die droë bestanddele. Roer tot goed gemeng, maar moenie nie te veel meng nie.

4. Skep in pan (of panne) en smeer die deeg met ’n houtlepel of spatel in die middel plat. Dit voorkom dat die brood met ’n hoë punt rys. Strooi geroosterde hawermout oor en druk liggies vas.

5. Bak die groot brood vir 50-60 minute en 40-45 min vir ’n kleiner brood, of tot ’n toetspen skoon uitkom. Laat staan vir 1-2 minute in die pan. Keer op ’n afkoelrakkie uit.

6. Sit warm saam met botter voor. Of laat afkoel en pak snye vir ’n kosblik of padkos met komkommer, wit beleë cheddarkaas, JAZZ ™ appelskyfies en slaaiblare.

Wenke

1. Rooster die hawermout sodra die oond verhit is. Plaas dit op ’n bakplaat en rooster vir 5-10 minute of tot ligbruin.

2. Ander bestanddele soos, biltong, kersietamaties, neute en vrugte soos appels, is ideale padkos.

 

Pin It on Pinterest

Share This