Subscribe for more recipes

Enter your email address to subscribe to this blog and receive notifications of new posts by email.

Patat-nachos met tuisgemaakte chakalakasous

Jun 8, 2018 | Kosblik 101 / Lunch boxes, Vegetarian

Kosblik 101

Spyskaart
Patat-nachos met tuisgemaakte chakalakasous
JAZZ™ appelwiggies met bloukaasdoopsous
Broccoli en blomkool
Neute

Ek kan nou ’n lang storie skryf oor hoe lekker die peuselhappies is, maar maak dit liewer net en geniet dit terdeë. Sit dit vir vriende en familie voor as julle weer sport kyk, om ’n braaivleisvuur of voor ’n kaggel kuier. Of dalk wil jy jou kinders met die patat-nachos bederf terwyl hulle vir die eksamen leer. So ’n plank vol knibbelhappies is selfs ’n lekker alternatief vir ’n voorgereg.

Die kombinasie van ’n geurige tuisgemaakte tamatiesous (chakalaka) met soet skyfies oondgeroosterde patat is heerlik en almal hou van ’n bietjie gesmelte kaas. Die res van die bord kan jy vul met vars groente en vrugte waarvan julle hou, maar die appel, blomkool en broccoli is besonder lekker saam met die bloukaas-doopsous.

Die chakalakasous-resep kom uit Cooking from the heart  en alhoewel dit in die boek met mieliepap voorgesit is, kan dit baie variasies op die tema hê. Dis vinnig en maklik om te maak en die vars gemmer en tikkie kerriepoeier saam met die tamatie, uie en soetrissie is die ideale manier om iets so basies soos ryp tamaties met natuurlike geurmiddels voor te berei. Die sous kan selfs op steak, hoenderfilette, porsies vis, met wors of frikkadelle voorgesit word. Of skep die sous oor gaar frikkadelle en sprinkel ’n bietjie kaas en sonneblompitte oor, bak in die oond en sit met groente voor.

Peuselhappies het dikwels een of ander vorm van deeg as basis of is diepgebraai – dus nie baie gesond nie. Die ander probleem is dat sulke happies jou vinnig vol laat voel en eintlik jou aptyt vir die ete wat nog moet volg, bederf. Om iets uit ’n pakkie oop te maak, is wel gerieflik maar beslis nie so gesond soos tuisgemaakte peuselhappies nie. En dit hoef nie baie tyd of moeite te verg nie. Maak die chakalaka vooraf en maak dit net weer vinnig warm voor jy dit nodig het. Die patatskyfies kan sommer rooster terwyl julle kuier en die bloukaas-doopsous meng jy in ’n japtrap – dit het net drie bestanddele. As daar iets soos neute of skyfies avokado of guacamole ook op die bord is, is die keuse van knibbelkos lekker wyd en sluit jy ook gesonde olies op dié manier in – sommer nog ekstra gesonder. ’n Goeie balans tussen die ryker smake en vars bestanddele, soos die appel en groente sorg dat daar iets vir elke smaak is.

 

JAZZ™ Appels is nou in seisoen en baie veelsydig. Ja, jy kan dit beslis nét so geniet, in ’n kosblik pak of as ’n happie tussen-in eet, want die pikante smaak is verfrissend en ideaal om enige tyd van die dag te geniet. Die sappige soet smaak is ewe lekker met ander soet en sout geure. In vorige resepte het ek dit al met kerriegeure gebruik, deel gemaak van ’n toebroodjievulsel en in ’n eenvoudige slaai gesit, om maar net ’n paar te noem. Appel en bloukaas is ’n bekende kombinasie en kan op baie maniere gebruik word, bv in ’n slaai. Vir dié doopsous, is ’n matige sterk bloukaas ideaal, sodat die sous nie te oorheersend is nie. Dis ewe lekker met liggies geblansjeerde blomkool en broccoli. Onthou dat JAZZ™ Appels by jou naaste Checkers beskikbaar is.

Ken jy die verskil tussen knibbel, knabbel en kibbel? Wel, ek het onlangs die ontdekking gemaak dat knibbel nie net verwys na peusel of knaag nie, maar ook kan beteken dat jy oor kleinighede stry, soortgelyk aan die woord kibbel. As jy oor onbenullighede stry of oor iets hare kloof, is jy inderdaad besig om te kibbel.

As dit oor die sinonieme vir knabbel gaan, kan jy dus knibbel, kou, peusel of knaag aan iets. Om meer hieroor te lees, kan jy die verskil tussen die HAT (Handwoordeboek van die Afrikaanse taal) en die WAT (Woordeboek van die Afrikaanse taal) se verduidelikings gaan bestudeer.

’n Bord vol peuselhappies, kan daarom ook knabbelhappies of knibbelhappies wees – net nog ’n manier om te wys hoe opwindend en veelsydig Afrikaans kan wees.Gaan kuier gerus ook by ’n ATKV Koswerf-restaurant op hul stoep met ’n tafel vol vriende en knibbel, knabbel of peusel aan ’n paar van die lekkertes op hul spyskaart. Hoe klink stiekie hoendervlerkies, geurige pizzas of trammezzini’s wat julle kan deel of as ete met ’n koue drankie geniet?

Resep

Patat-nachos met tuisgemaakte chakalakasous

Resep aangepas uit Cooking from the heart 1
Lewer 4 – 6 porsies

Bestanddele

Chakalakasous

10 ml (2 t) olyf-of avokado-olie

1 ui, gekap

1 cm stuk vars gemmer, gerasper

1 rooi soetrissie, ontpit en gekap

5 ml (1 t) paprika

5 ml (1 t) matige kerriepoeier

4 ryp tamaties, geskil en gekap (sien wenk)

suurlemoensap en peper na smaak

handvol vars koljanderblare

Patat-nachos

30 ml (2 e) olyf-of avokado-olie

500 g klein patats, in baie dun skyfies gesny

200 ml gerasperde wit cheddarkaas

Metode

1. Chakalakasous: Verhit olie oor ’n matige hitte in ’n kastrol (bv. ’n AMC 20 cm Low) en braai die ui, gemmer en rooi soetrissie saam tot sag. Voeg die paprika, kerriepoeier en tamaties by. Verlaag die hitte en prut vir 20 minute of tot ’n dik sous. Geur met suurlemoensap, peper en vars koljanderblare.

2. Patat-nachos: Voorverhit die oond tot 200-220˚C. Voer ’n bakplaat of twee met bakpapier uit.

3. Plaas olie in ’n mengbak en voeg die patatskyfies by en meng tot bedek is. Pak op die bakplate.

4. Rooster die skywe vir 12-15 minute of tot goudbruin en bros.

5. Pak die gaar patat-nachos op ’n oondbak of hitte-bestaande bord en skep die chakalakasous oor. Strooi die kaas oor en rooster vir 5 minute of tot goudbruin en die kaas gesmelt het.

6. Sit voor met koljanderblare en pak op ’n groot houtbord met ’n bloukaas-doopsous (sien wenk), vars JAZZ™ appelwiggies, groente soos blomkool en broccoli. Neute en avokado of guacamole is ’n maklike manier om ook gesonde vette in te sluit.

Wenke

1. Bloukaas-doopsous: Meng 250 ml (1 k) ongegeurde of Griekse jogurt met 45 ml (±50 g) bloukaas en 25 ml (5 t) gekapte Italiaanse pietersielie.

2. Vervang die vars tamaties met 1-2 x 410 g-blikkies gekapte tamaties.

3. Geur die chakalakasous met kruie in plaas van speserye, indien verkies. Italiaanse geure soos basiliekruid of origanum sal lekker wees.

4. Om ryp tamaties te skil, sny met ’n geriffelde groentemessie ’n kruisie aan die stingelkant van die tamatie. Plaas in ’n hittebestande bak en giet kookwater oor. Laat dit vir ’n paar minute staan en trek dan die skilletjies af. Die tamaties kan dan in blokkies gesny en vir die resep gebruik word, of vries dit vir ’n volgende keer. Onthou, hoe ryper die tamaties is, hoe makliker skil dit af.

Pin It on Pinterest

Share This