Subscribe for more recipes

Enter your email address to subscribe to this blog and receive notifications of new posts by email.

Mieliepaptert met sampioene

May 4, 2018 | Kosblik 101 / Lunch boxes, Sides & salads, Starchy side

Kosblik 101

Spyskaart
Mieliepaptert met sampioene
Richard Bosman keuse van spesialiteit-kouevleise
Slaaibestanddele
JAZZ™ Appels

Het jy ook met pap as ’n stysel vir etes grootgeword? Veral met braaivleis of wors en sous? Ek is dol daaroor, maar ander kan glad nie verstaan dat ’n mens hieroor opgewonde kan raak nie. Daar is ook verskillende maniere waarop liefhebbers daarvan hou – fyn krummels, loperig, in groot, sagte klonte of dan soos hier in ’n paptert-styl gebak.

Paptert kan soms onnodig ryk wees, met room of baie kaas en selfs ander bestanddele soos spek, maar dan voel dit vir my of jy nie eintlik meer die mieliepap proe nie. Ek verkies ’n eenvoudiger weergawe, soos hierdie een met ’n bolaag van vars sampioene, uiewiggies en mieliepitte. Terwyl dit bak, word die geure van die bolaag deel van die gereg en dis heerlik. Die gereg kan warm of teen kamertemperatuur geëet word.

Gebruik ’n lekker growwe mieliemeel, sodat die gereg baie vesel bevat, want onthou, mieliemeel bly ’n vorm van stysel, so hoe minder verfyn dit is, hoe beter. Die meel het heelwat vloeistof nodig, so moenie skrik vir die baie loperige mengsel wat jy in die oondbak gaan skep nie. Al die vloeistof word geabsorbeer soos die meel gaar word. Soos met vele vorige resepte, bly die keuse van bestanddele om ’n gereg te geur, ’n belangrike aspek van gesonde koskeuses. So, in plaas van ’n onnodige klomp botter of room, is die sampioene en mielies ’n smullekker en gesonde opsie.

Onthou ook dat porsiebeheer altyd, en veral met stysel, belangrik is. Dit bly ’n goeie beginsel van ’n gesonde leefstyl en is deel van die riglyne wat in Cooking from the heart se resepte prakties uiteengesit en toegepas word. Die mieliemeelgereg kan dus steeds deel wees van ’n gebalanseerde ete, veral met die sampioenbolaag, want sampioene is vol voedingswaarde en ’n baie lekker kombinasie met die mieliepitte en vars tiemie.

Sampioene is ook ’n gerieflike bestanddeel om as deel van die aanbevele 5-’n-dag vars vrugte of groente in etes in te sluit, want dit kan ewe maklik rou of gaar gebruik word. Daar is verskillende soorte vars sampioene beskikbaar en veral die groter, meer neuterige sampioene is ideaal om dié gereg mee te geur. Die natuurlike souterige smaak (umami) van sampioene maak dit verder veelsydig, want dan kan jy heelwat minder sout in geregte gebruik. Moenie sampioene was nie, vee dit net met ’n stukkie kombuispapier af of gebruik ’n sagte sampioen-borseltjie. Die struktuur van sampioene maak dat hulle soos klein sponsies reageer, so as dit gewas word, is daar onnodig baie vog in die gereg. Daar is nog sulke praktiese wenke op die Mushroom SA webwerf, gaan blaai sommer bietjie daar rond as jy meer wil weet.

Om seker te maak dat etes gebalanseerd is, moet daar iets uit elke voedselgroep ingesluit word. Saam met die paptert, is ’n keuse van kouevleise ideaal vir ’n piekniek of selfs kosblik. Richard Bosman is baie trots op die gehalte van sy reeks kouevleis. Hy vertel met groot passie hoeveel moeite gedoen word om die diere te versorg en te hanteer, selfs voor die verwerkingsproses begin word. Hulle gebruik nog spesialismetodes om die vleis te verwerk en geen masjienontbeende vleis word vir sy produkte gebruik nie – alles word nog met die hand gedoen. Hou jou oë oop vir die Richard Bosman seleksie van kouevleise vir ’n volgende ete in ’n al fresco-styl of selfs ‘n piekniek. Daar is drie soorte vleis in die pakkie: papierdun skyfies bresaola, wat van beesvleis gemaak en met rooiwyn en speserye gegeur word. Dan coppa, wat van dun skyfies varkskouer gemaak word en salami. Volg gerus Richard se blog om meer oor sy produkte te lees en daar kan jy ook sien waar dit beskikbaar is.

En dan is iets vars en seisoenaal altyd ’n goeie idee. JAZZ™ Appels is nou in groot winkels beskikbaar – gaan kyk spesiaal by Checkers winkels landwyd daarvoor. Die mooie rooi appels is sappig, kraakvars en verfrissend en die perfekte toevoeging tot ’n ete of selfs as peuselhappie. Jy hoef nie veel met die appel te doen om dit deel te maak van ’n heerlike kosblik- of ander inpak-ete nie. Vir nog idees en resepte met die lekker appel, besoek hul webwerf

 Oudergewoonte borg die ATKV ook weer ’n Afrikaanse kosterm vir die week. Die beskrywings wat ons in Afrikaans het om die mate van ’n bestanddeel aan te dui is vir my pragtig en só beskrywend. Sommige woorde word ook baie tipies met spesifieke bestanddele gebruik. ’n Skeut olie of vloeistof dui die hoeveelheid aan wat jy in een beweging kan skink. ’n Knippie is gewoonlik die hoeveelheid wat jy tussen twee vingerpunte kan vasvat, soos met sout, speserye of kruie. ‘n Spatsel, druppel of drupsel is nog mooi maniere om na ’n klein hoeveelheid vloeistof te verwys. Afrikaans is regtig ’n beskrywende taal en dis vir my heerlik om ook hierdie woorde in resepte en kosdemonstrasies te kan gebruik.

Resep

Mieliepaptert met sampioene

Resep aangepas uit Cooking from the heart 1
Lewer 4 – 6 porsies

Bestanddele

500 ml (2 k) growwe mieliemeel

500 ml (2 k) melk

500 ml (2 k) water

90 ml (6 e) olyf- of avokado-olie

2 mielies aan die stronk, gekook en pitte van die stronk afgesny

15-20 ml (3-4 t) vars tiemieblare

sout en varsgemaalde swartpeper na smaak

1 klein ui, in dun wiggies gesny

125 g portabellinisampioene, in kwarte of wiggies gesny

10-12 ekstra takkies vars tiemie

Metode

1. Voorverhit die oond tot 180 °C en voer ’n oondpan met bakpapier uit en smeer liggies met olie. (Gebruik liewer ’n vlakker as té ’n diep pan, anders bak die gereg baie lank. Of smeer ’n oondbak liggies met olie.)

2. Meng mieliemeel, melk, water, olie, helfte van die mieliepitte en die tiemieblare saam in ’n mengbak. Geur na smaak en skep in die oondbak.

3. Pak die ui, sampioene en die res van die mielies in ’n eweredige laag oor die mieliemeelmengsel. Strooi tiemietakkies bo-op.

4. Bak vir 1 uur of tot die meel gaar en gereg goudbruin bo-op is. Sit dadelilk warm voor of laat effens afkoel en sny dan in blokkies.

5. Sit voor as deel van ’n gebalanseerde piekniek of kosblik met vars slaaibestanddele, JAZZ™ appels en jou keuse van Richard Bosman se spesialiteit-kouevleis.

Pin It on Pinterest

Share This