Pink Lady® Appel compote

Appels, korrelmosterd, ‘n bietjie asyn en siedaar – ‘n baie lekker appel-compote wat op verskillende maniere gebruik kan word. Maak ‘n flessie of twee vol en hou dit in jou yskas om ‘n hamburger, varkworsie of stukkie steak in ‘n japtrap op te kikker.

Resep

Pink Lady® Appel compote

Lewer 200-250 ml

Bestanddele

15 ml (1 e) olyf- of avokado-olie

1 ui, fyngekap

125 g Cecilia’s Farm Pink Lady® Apple Wedges (gedroogde appelwiggies), gekap

30 ml (2 e) korrelmosterd

10 ml (2 t) bruinsuiker

10 ml (2 t) balsamiese asyn

250 ml (1 k) wit wyn asyn of Rooibostee

Metode

1. Verhit olie in ’n braaipan (gebruik ’n AMC 24 cm Gourmet Chef’s Pan) en soteer die ui tot gaar. Voeg die gedroogde appel by en soteer vir ’n paar minute.

2. Roer die res van die bestanddele by. Verlaag die hitte.

3. Prut 30-45 minute of tot die mengsel amper taai is. Voeg nog vloeistof by indien nodig.

4. Sit warm of teen kamertemperatuur voor met varkworsies, hoenderfilette of sien wenke vir meer idees. Skep warm compote in ’n gesteriliseerde fles, laat heeltemal afkoel en bêre in die yskas tot benodig

Wenke

1. Die compote is heerlik met boerewors of enige ander braaivleis.

2. Sit die compote as deel van ’n kaasbord voor. Dit is lekker met enige beleë cheddar of camembert.

3. Roer die compote by koeskoes of gaar bruin basmatirys vir ’n interessante bygereg.