Subscribe for more recipes

Enter your email address to subscribe to this blog and receive notifications of new posts by email.

Pasta-oondgereg met hoender & broccoli

Feb 2, 2018 | Kosblik 101 / Lunch boxes, Mains, Poultry

Kosblik 101

Spyskaart
Pasta-oondgereg met hoender & broccoli
Tamatie en soetrissie-slaai

’n Paar bekende bestanddele kan maklike in ’n oondgebak omskep word wat vir die hele gesin gaan lekker wees. Broccoli en hoender is ’n algemene kombinasie en as jy dit met pasta meng en soos ’n macaroni-en-kaas bak, het jy in ’n japtrap aandete. En behalwe daarvoor, kan jy ook sommer terselfdertyd ’n paar bestanddele gaarmaak vir die heel jongste lede van die gesin – veral die wat dalk nog nie daarvan hou dat alles saamgemeng is in een gereg nie.

Ek is ’n groot voorstaander van die idee om kinders van babadae af te leer om so ver as moontlik dieselfde kos as die res van die gesin te eet. Dit maak jou kookwerk soveel makliker en stel hulle van kleins af bloot aan kos wat beslis nie net opgekook of vaal en vervelig is nie. Sulke kinders is gewoonlik heelwat minder kieskeurige etertjies. Hulle kan aanvanklik kosse apart eet, of dit in ’n fyner formaat kry en op die manier leer om van tuisgemaakte kos te hou, in plaas van iets uit ’n botteltjie van ’n winkelrak.

Deur hoender gaar te maak soos in hierdie resep, bly dit lekker sappig en jy kan sommer dubbel die hoeveelheid hoender gaarmaak. Vries ’n gedeelte vir ’n tweede maaltyd of gebruik dit vir kleiner kinders se etes. Die hoender kan in klein stukkies gesny of selfs fyner gepluis word, afhangend van hoe maklik hulle al kan kou. Kook die pasta en broccoli soos dit hier onder verduidelik is en hou ook daarvan apart as dit nodig is. Druk die broccoli fyner vir ’n baba wat leer om vaste kos te begin eet, dis so ’n gesonde groente. Kies ’n pastavorm wat vir klein vingertjies maklik is om te hanteer en laat hulle gerus toe om met hul handjies te eet. Op die manier ervaar hulle die teksture van kos soveel beter en dis sommer goeie oefening vir hul hand-oog-koördinasie. Wees kreatief met die maniere waarop jy kinder leer om van groente te hou. My kinders het van broccoli-boompies gepraat toe hulle klein was en heerlik daaraan leer smul.

Pharma Dynamics se inisiatief, Cooking from the heart, is juis gemik daarop om gesinne te help om ’n gesonde leefstyl te volg. Die voordele wat dit inhou is ’n lang lys, maar onder andere kan dit jou kinders dalk help om nie eendag leefstylsiektes, soos diabetes, hartkwale, probleme met hul gewig of bloeddruk te ontwikkel nie. Genoeg rede om jou kinders te leer om die regte koskeuses te maak. Cooking from the heart se fokus is drie resepteboekies wat gratis op hul webwerf beskikbaar is en ek gebruik elke week op In & Uit Kosblik op kykNet se Die Groot Ontbyt een van die resepte of kry inspirasie daaruit. Deesdae is daar op hul Facebook-blad ook ambassadeur vir die projek, met die naam Ginger. Gaan loer gerus daar en kry weeklikse spyskaarte met ’n volledige inkopielys en vele wenke om dinge prakties te maak.

Vir vandag se oondgereg gaan jy beslis eiers nodig hê. Dis nie net ’n manier om die bestanddele saam te bind nie, maar ’n baie voedsame bestanddeel wat jy op baie maniere in jul etes kan gebruik. Sommige klein kinders is sensitief vir ‘n ‘skoon’ eier net so op sy eie, maar so in ’n gereg kan hulle dit dikwels wel eet sonder om geaffekteer te word. Stel hulle op die manier geleidelik bloot aan eier. Nulaid het verskillende groottes eiers beskikbaar en vir hierdie gereg werk ekstra-groot eiers uitstekend. Lees op hul webwerf meer oor al die gesondheidsvoordele wat eiers veral vir groeiende kinders inhou.

Die slaai wat saam met die ete voorgesit word, is regtig maklik om voor te berei, maar so kleurvol en geurig, dat jy dit eenvoudig moet maak. Feta en kruisement is ’n uitstekende kombinasie om iets so basies soos tamaties en soetrissie in ’n interessante slaai te omskep. Onthou ’n goeie skeut olyfolie en swartpeper om dit mee voor te sit.

Gepraat van soetrissie. Baie mense verwar dit met ’n brandrissie wanneer hulle net na ’n rissie verwys. Beide is deel van die capsicum kultivar en is in verskillende groottes, vorms en kleure beskikbaar, maar ’n soetrissie is, soos sy naam sê ‘soet’ en ’n brandrissie inderdaad heelwat skerper en ‘warm’ op jou tong. In Engels word daar onderskei tussen ‘n sweet pepper of bell pepper vir ’n soetrissie en ’n chilli (brandrissie). Die ATKV borg elke week ’n woord of uitdrukking uit die kombuis op In & Uit Kosblik en hierdie is vandag se woord, so onthou dat dit ‘n soetrissie is wat in hierdie slaai gebruik word. ’n Brandrissie gaan ’n heeltemal ander resultaat oplewer en oë wat gaan traan en ’n mond wat brand…

Resep

Pasta-oondgereg met hoender & broccoli

Resep aangepas uit Cooking from the heart 1
Lewer 6 porsies

Bestanddele

15 ml (1 e) olyf- of avokado-olie

2 uie, gekap

3 hoenderborsies aan die been, gehalveer, vet en vel verwyder

125 ml (½ k) water

10 ml (2 t) gedroogde gemengde kruie

250 g penne of enige ander pasta van jou keuse

5 ml (1 t) sout

300 g broccoli, in blommetjies gesny

suurlemoensap en swartpeper na smaak

4 ekstra-groot Nulaid eiers, geklits

600 ml melk

10 ml (2 t) korrelmosterd

30 ml (2 e) sesamsaad

Metode

1. Verhit ’n klein bietjie van die olie in ’n braaipan (bv. AMC 24 cm Chef’s Pan) en soteer die uie tot sag.

2. Voeg nog ’n bietjie van die olie in die pan en braai hoender vir ’n paar minute aan beide kante tot goudbruin. Verlaag die hitte en voeg die water en kruie by.

3. Bedek en prut vir 20 minute of tot die hoender gaar,maar nog steeds sappig is. Skep die hoender uit en hou die vloeistof eenkant. Verwyder die hoenderbene en sny of vlok die vleis kleiner.

4. Plaas genoeg water in ’n groot kastrol (bv. ’n AMC 24 cm High) en bring tot kookpunt. Voeg penne en 2,5 ml (½ t) sout by en kook tot feitlik gaar. Voeg die broccoli vir die laaste 2 minute by of tot dit net gaar, maar steeds heldergroen is. Dreineer die pasta en broccoli saam.

5. Meng die hoender en uie-mengsel met die broccoli en pasta. Roer die res van die olie en sout by en geur met suurlemoensap en peper. Skep in ’n groot oondbak.

6. Klits die eiers, melk en mosterd saam, geur met peper en skink bo-oor die hoendermengsel.

7. Strooi die sesamsaad bo-oor en bak vir 45 minute of tot goudbruin en gestol.

8. Sit voor met ’n eenvoudige, maar treffende slaai van ryp tamaties, rooi en oranje soetrissie, kruisement en feta.

Wenke

1. Slaai: sny ryp tamaties in wiggies – groot of klein tamaties kan gebruik word. Voeg repies rooi en oranje of geel soetrissie by en geur dit met fetakaas en vars kruisementblare vir ’n baie geurige en verfrissende slaai. Dit het nie ’n slaaisous nodig nie, maar net ’n lekker olyf- of avokado-olie en ’n lekker draai swartpeper.

2. Dié pastagereg kan selfs die volgende dag in ’n kosblik gepak word of hou van die elemente apart om saam met nog vars goed in ’n kosblik te pak.

Pin It on Pinterest

Share This