Subscribe for more recipes

Enter your email address to subscribe to this blog and receive notifications of new posts by email.

Geroosterde broccoli-&-blomkoolslaai

Jan 26, 2018 | Kosblik 101 / Lunch boxes, Light meals, Light vegetarian, Sides & salads

In & Uit Kosblik 101

Spyskaart
Geroosterde broccoli-en-blomkoolslaai met kekerertjies

Blomkool en broccoli het in die laaste paar jaar vinnig op die groente-gewildheidsleer geklim. Die twee groentes is lankal nie meer net vir ’n kaassous beskore nie en deesdae kry jy baie interessante maniere om dit voor te sit. Hierdie is beslis in my kombuis ’n gunsteling. Dis so maklik om te maak en as jy nog nie voorheen geroosterde blomkool en broccoli geproe het nie, moet jy dit beslis probeer.

Beide groentes kry ’n lekker neuterige smaak as dit gerooster word en aangesien die twee aan die delikate kant is, rooster dit aansienlik vinniger as harder groente soos botterskorsie, wortels of patats. Die suurlemoensap en komynsade is perfekte pasmaats en met so ’n tuisgemaakte marinade van alledaagse bestanddele weet jy ook presies wat in jou ete ingesluit is. Feta en vars kruisement gee die groente in ’n opwindende en vars slaai-gevoel en met die kekerertjies wat bygeroer word, is dit sommer ook ’n volledige vegetariese maaltyd of aandete vir ’n vleislose (Maan)dag.

Moenie die voedingswaarde van broccoli en blomkool onderskat nie – dis ’n baie goeie bron van vitamiene en minerale en ook veselryk. Dis veral belangrik dat die groente nie oorgaar moet wees nie, want dan gaan heelwat van die gesonde voordele maklik verlore. Die twee groentes is ook ’n wonderlike alternatief vir meer tipiese ‘wit’ stysels soos rys, pasta of kapokaartappels om saam met vleis, hoender of vis te eet. Deur kekerertjies by te voeg, is die slaai beslis vullender, aangesien kekerertjies ’n bron van veselryke stysel en ook proteïene is. Die slaai sal jou dus langer versadig hou as wanneer dit byvoorbeeld net die twee groentes sou wees.

Die styl van hierdie slaai pas perfek by die gesonde leefstyl-beginsels wat in Pharma Dynamics se Cooking from the heart-resepteboeke verduidelik word. Die geroosterde broccoli en blomkool-resep kom uit die derde boek, wat spesifiek op diabete gefokus het. Die klem het onder andere op bygeregte geval wat as alternatief vir stysel voorgesit kan word en net so lekker is, maar nie naastenby dieselfde hoeveelheid verfynde stysel as bv. rys bevat nie.

Die woord wat die ATKV hierdie week vir In & Uit Kosblik borg, is kekerertjies. In Engels en veral op verpakkings word dit chickpeas genoem. Vra bietjie jou vriende hoeveel van hulle weet wat die mooi Afrikaanse woord hiervoor is. Kekerertjies is vir my ’n pragtige Afrikaanse woord, want dit rol so lekker van jou tong af – en smaak net so lekker. Dit kom in geblikte en droë vorm voor en is baie gewild in Mediterreense geregte en heerlik met bestanddele soos suurlemoen, komyn, feta en kruisement.

Onthou om in die somer steeds genoeg water te drink – dit bly die beste manier om jou dors te les. Halo se nuwe reeks hervulbare, herwinbare waterbottels is in pragtige kleure beskikbaar. Kies jou gunstelingkleur en onthou dat die bottels in twee groottes gekoop kan word, 350ml of 750 ml. Vir baie warm dae kan die bottels selfs die vorige aand in die vrieskas gesit word. Vul die bottel net tot by die boonste rekkie op die bottel, sodat daar genoeg plek in die bottel oorbly vir die water om uit te sit soos dit vries.

Resep

Geroosterde broccoli-&-blomkoolslaai met kekerertjies

Resep aangepas uit Cooking from the heart 3
Lewer 4 – 6 porsies

Bestanddele

300 g broccoli, in blommetjies gesny

300 g blomkool, in blommetjies gesny

30 ml (2 e) olyf- of avokado-olie

suurlemoensap en swartpeper na smaak

10 ml (2 t) komynsaad of 15 ml (1 e) gemaalde komyn

60 ml (¼ k) Rooibostee

1 x 410 g-blik kekerertjies, gedreineer

handvol vars kruisement of roketblare

1 skyf fetakaas, gekrummel

’n handvol sonneblomsaad

Metode

1. Voorverhit die oond tot 200 °C. Meng die olie, suurlemoensap, peper, komyn en tee goed saam en roer deeglik deur die broccoli en blomkool.

2. Skep groente in ’n groot oondbak en rooster vir 15–20 minute of tot net gaar. Laat groente afkoel.

3. Roer die kekerertjies en vars kruie by en strooi feta en sonnneblomsaad bo-oor. Sit teen kamertemperartuur as slaai, bygereg of vegetariese ete voor.

Wenke

1. Sit as bygereg met geroosterde vis, hoender of enige vleis van jou keuse voor. Die gereg is ook heerlik warm.

2. Voeg repies gaar hoender met die kekerertjies by om dit ’n meer vullende ete te maak.

3. Gekapte brandrissie of ander geurmiddels soos paprika of borrie sal lekker wees saam met die ander speserye in die gereg.

 

Pin It on Pinterest

Share This