Subscribe for more recipes

Enter your email address to subscribe to this blog and receive notifications of new posts by email.

Lekkerste lensie-&-eiervrugslaai

Nov 24, 2017 | Kosblik 101 / Lunch boxes, Sides & salads, Starchy side

Kosblik 101

Spyskaart
Lensie-en-eiervrugslaai
Vrugtekebabs
Neute en sade

’n Lensie-en-eiervrugslaai is vandag op die spyskaart. Noem dit sommer die lekkerste lensieslaai, want selfs mense wat dink lensies is vaal en vervelig of die wat nie baie van eiervrug hou nie, skep gou nog van dié slaai.

Hierdie resep kom uit my laaste resepteboek, Maak vyf en is een van daardie resepte wat mense dikwels sê, ‘sjoe, ek het nie gedink lensies kan so lekker wees nie’. Die kombinasie van geure en die manier waarop die eiervrug en lensies gaargemaak word, dra beslis by tot die lekker smaak en tekstuur.

Eers word die eiervrug met die skil (ek skil nooit eiervrug nie) in blokkies gesny en met roosmaryn en bietjie knoffel in ’n pan gesoteer en dan effens geprut tot dit gaar, maar nie pap is nie. Daarna word die lensies in dieselfde pan met takkies roosmaryn gekook tot dit net gaar is. Die eiervrug en lensies kry dus beide kans om die roosmaryn- en knoffelgeure te absorbeer. Vir afronding word gemarineerde songedroogde tamaties, feta en ‘n handvol of twee basiliekruid- en roketblare bygesit.

Vir hierdie resep kook ek self die lensies, want geblikte lensies gaan beslis nie geure op dieselfde manier kan absorbeer nie. Die Droëbone Produsente Organisasie het ’n verskeidenheid van lensies op die mark en vir die slaai is die groter bruin lensie vir my heerlik, maar enige bruin lensie sal goed werk. Lensies is ’n uitstekende bron van gesonde vesel en dra ook koolhidrate (stysel) en proteïene by tot ’n ete, so hierdie lensiegereg kan beslis as bygereg voorgesit word, maar is ’n heerlike vegetariese ete. En dan ideaal vir ’n kosblik of ligte somersete, veral as mens ’n ligter, maar vullende middagete wil eet omdat jy dalk weet daar lê nog ’n groot aandete voor.

Lensies het van natuur ’n effens neuterige, maar andersins meer neutrale smaak wat dit juis ideaal maak om ’n verskeidenheid geure daarby te kan gebruik. Lensies hoef ook nie vooraf geweek te word soos droë bone nie en prut binne 25-30 minute sag, maar dit moenie pap wees nie. Spoel die lensies vir ’n slaai sommer dadelik af, sodra dit gaar is, om seker te maak dit word nie verder gaar nie.

Gesonde olies is ’n belangrike deel van ’n gesonde manier van eet en ek gebruik baie graag avokado-olie. Dit is propvol gesonde omega’s en regtig veelsydig, want met die hoë brandpunt kan jy daarmee bak, braai, soteer en rooster. Of anders kan die olies net soos ’n slaaisous gebruik word. Westfalia Fruit  se reeks avokado-olies het nou ’n splinternuwe verpakking, so kyk gerus uit daarvoor. Daar is vier geure in die reeks, gewoon, knoffel, suurlemoen en botter.

Vir vandag se resep gebruik ek gedeeltelik van die knoffelgegeurde olie, dan hoef ek nie nog eers ‘n knoffelhuisie te skil nie, so dit is sommer gerieflik ook. Die knoffelgeur is prominent genoeg, maar sal nie die ander geure oorheers nie, net lekker aanvul. In die nuwe verpakking het die knoffel ’n pers omhulsel om die nek, so jy kan dit nie miskyk nie.

In vele van die Kosblik-blogs tot nou, was daar al baie wenke en idees gegee om almal aan te moedig en te help om gesond te eet. Nie net vir kosblikke nie, maar vir elke ete van die dag. Die basiese beginsels bly dieselfde: ete moet voedsaam, vullend en gebalanseerd wees en as mens met vars en onverfynde produkte werk, is dit net soveel lekkerder en gesonder. Heelwat van die resepte en wenke het ook uit die reeks resepteboekies van Pharma Dynamics gekom, Cooking from the heart. In die tweede boek, is ’n hele afdeling aan peuselhappies gewy en met goeie rede. Dikwels is mense se etes heel gesond, maar wanneer dit by peusel kom, is die gerieflike en maklike winkel-opsies soms die rede waarom die res van hul dag nie so voedsaam is nie.

Of julle tussen etes wil peusel en of die kinders iets soek om hul kake mee besig te hou terwyl hulle studeer, probeer om gesonde peuselhappies beskikbaar te hê. Dis sommer ook ’n lekker praktiese plan vir die vakansietyd wat voorlê, want oppad of tydens vakansie is almal dikwels meer lus vir peusel. Hou peuselhappies ook kleurvol en interessant om almal sommer ekstra lus te maak daarvoor. Onthou dat ’n peuselhappie jou moet help om versadig te bly tot en met die volgende ete, so dit moet verkieslik ook nie jou bloedsuikervlakke te vinnig laat styg nie, want dit laat jou net meer lus voel vir soetgoed. Hou steeds die porsie wat jy eet ingedagte, sodat dit ook nie jou aptyt vir die volgende ete belemmer nie. Tuisgemaakte peuselhappies is beslis ook goedkoper as gekoopte weergawes.

Hier is ’n paar gesonder idees. Meeste hiervan is op my webwerf in vorige Kosblik-blogs ook al in meer detail beskryf, gebruik gerus die soek-funksie om die resepte te kry.

  • Neute: rou en ongesout verkieslik, of rooster self neute en geur dit met paprika of kaneel.
  • Sade of selfs ’n mengsel van sade en neute waarvan jullle hou.
  • Vars vrugte, dit kan selfs vir die kinders op stokkies geryg word. Sit blokkies kaas by om dit meer vullend te maak.
  • Ryg groente soos klein tamaties, komkommerwiggies en kaas op stokkies. Wortelrepies is ook iets wat kinders gewoonlik baie
    geniet.
  • Biltong met nie te veel sout of vet nie
  • Geur gladde maaskaas of ongegeurde jogurt met vars kruie, mosterd, paprika, fyngerasperde suurlemoenskil of ‘n kombinasie van enige van die opsies om as doopsous te gebruik met groenterepies of selfs wiggies peer, appel, perske of druiwe.
  • Vir ’n soeter doopsous, kan ongegeurde jogurt met vanielje (-poeier of geursel sal lekker wees) en suurlemoenskil of ‘n knippie gemaalde kaneel gegeur word. Doop seisonale vrugte en bessies daarin vir ‘n lekker peuselhappie of selfs as nagereg.
  • Meng grondboontjiebotter by ongegeurde jogurt vir ‘n baie lekker doopsous met vrugte.
  • Tuisgemaakte muesli kan in klein porsies aan gepeusel word, of doop vrugte eers in ongegeurde jogurt en dan in van die muesli.

Resep

Lekkerste lensie-en-eiervrugslaai

Resep uit Maak vyf/ Make five
Lewer 4 – 6 porsies

Bestanddele

15 ml (1 e) Westfalia knoffel-gegeurde avokado-olie

30 ml (2 e) Westfalia gewone avokado-olie

1 groot eiervrug, in blokkies gesny

1 groot ui, gekap

15 ml (1 e) gekapte vars roosmaryn

15 ml (1 e) suurlemoensap

sout en peper

250 ml (1 k) rou bruin lensies, afgespoel

2 ekstra takkies roosmaryn

1 skyf fetakaas, in blokkies gesny

6 gemarineerde songedroogde tamaties, in repe geskeur

’n handvol vars roket- en basiliekruidblare

Metode

1. Verhit die twee olies oor matige hitte in ’n braaipan (gebruik ’n AMC 24 cm Chef’s pan) en soteer eiervrug, ui en roosmaryn bietjie vir bietjie tot goudbruin. Voeg meer olie by indien nodig. Skep eiervrugmengsel terug in die pan en roer die suurlemoensap by.

2. Geur na smaak en sit die deksel op. Prut 5-10 minute of tot gaar. Skep uit en laat afkoel.

3. Plaas die lensies met die roosmaryntakkies en ’n knippie sout in dieselfde pan. Giet 500 ml (2 k) water oor en verhit oor matige hitte tot kookpunt. Stel die hitte laer en prut met die deksel op vir 30 minute of tot sag. Haal die roosmaryntakkies uit.

4. Dreineer die lensies en spoel af met koue water om te keer dat dit verder gaar word.

5. Meng die lensies met die eiervrug. Roer die res van die bestanddele by, geur na smaak en sit koud of teen kamertemperatuur voor.

Wenke

1. As jy nie baie tyd het, kan die droë lensies met 2 x 410 g-blikke bruin lensies vervang word. Dreineer en voeg by die eiervrug met die res van die bestanddele in stap 5.

2. Vervang die fetakaas met bokmelkkaas of sit voor met jogurt en kruisementblare.

3. Wanneer granate in seisoen is, vervang die songedroogde tamaties daarmee.

Pin It on Pinterest

Share This