Subscribe for more recipes

Enter your email address to subscribe to this blog and receive notifications of new posts by email.

Maklikste viskoekies

Oct 13, 2017 | Kosblik 101 / Lunch boxes, Mains, Seafood

Kosblik 101

Spyskaart
Maklikste viskoekies (resep aangepas uit Cooking from the heart 1)
Aartappeltjies in die skil
Groenboontjies, soetrissies en aarbeie

Geurige viskoekies, aartappeltjies in die skil en ‘n groot slaai is in my opinie koningskos. Soos Julia Child tereg sê: ‘You don’t have to cook fancy or complicated masterpieces, just good food from fresh ingredients.’

Iets so basies soos ’n blikkie vis is genoeg om ‘n heerlike gesinsete op te tower. In die week is ons almal se programme vol en die dae soms lank, so as jy dan vinnig na werk iets vir aandete kan maak wat bekostigbaar, vinnig, gesond en boonop baie lekker is, gaan jy beslis die resep weer maak. My kinders is absoluut gek oor hierdie viskoekies en dis ewe lekker teen kamertemperatuur, so ek maak altyd ‘n dubbele mengsel om vir die volgende dag of drie iets vir hul kosblikke gereed te hê.

Nou mag jy dalk dink dis vervelig om vir meer as een dag viskoekies in ‘n kosblik te kry, maar as jy elke dag iets anders daarmee saam inpak, is dit mos ideaal. Die res van die dag is daar ook ander bronne van proteïne met ontbyt en aandete, dus ‘n lekker verskeidenheid. Vis is ook so gesond, dat dit geen skade sal doen om dit gereeld te eet nie.

Baie mense ken viskoekies as ‘n mengsel van gaar vis en aartappel wat eers gevorm, dan gekrummel en dikwels in diep-olie gebraai word. Dis nogal ‘n tydrowende proses, so hierdie manier om ‘n viskoekie te maak, is aansienlik makliker. Die resep kom uit Cooking from the heart se eerste resepteboek en dit bly gewild. Daar is ook baie maniere waarop die geurmiddels bietjie aangepas kan word, bv met ander kruie soos tiemie of deur die wortel met murgpampoentjie te vervang.

Ek probeer gereeld my aandetes so beplan dat ‘n deel daarvan ook vir kosblikke kan werk en hierdie resep is presies een van daardie. Dit maak my eie beplanning ook net soveel makliker. As die viskoekies en aartappels of selfs mielies vir aandete gemaak word, kook ek sommer ook ‘n paar ekstra vir die kosblikke. Dit pak ek die volgende oggend met vars slaaibestanddele en vrugte wat dan in seisoen is. Kinders is gewoonlik baie lief vir aarbeie en ander somervrugte. Op die manier is jy seker van ‘n gebalanseerde kosblik vir elkeen. Aarbeie kan ook as peuselhappie later in die dag geniet word.

Die beginsels van ‘n gesonde leefstyl en daarmee saam natuurlik ook kosblikke, is dieselfde as wat in Cooking from the heart se drie resepteboeke as fokus gebruik word.

Sardyne is ‘n baie gesonde bron van proteïen en boonop is die graatjies baie ryk aan kalsium. Druk die grate sommer saam met die vis fyn en moet dit nie probeer uithaal nie. Die vloeistof in die blikkies is ook ideaal om as deel van die mengsel te gebruik. Sardyne en sardientjies is ook bekend as een van die olierige tipes vis – dus ryk aan gesonde omega 3 vette. Nog meer rede om dit gereeld in ons etes in te sluit. Jy weet mos jou ma het altyd gesê: vis maak jou slim. Nou weet jy hoekom.

Deel daarvan om gesonde eetgewoontes te hê, is om seker te maak dat jy en jou gesin ‘n verskeidenheid van kosse eet. Dit verseker dat jy nie byvoorbeeld proteïen net van een bron kry nie, want elk bron voorsien ook iets anders. So is rooivleis ook ‘n bron van yster en eiers bevat ‘n wye verskeidenheid vitamiene en minerale en selfs antioksidante. So as jy eiers in hierdie viskoekies gebruik, is dit nie net om dit te bind nie, maar ook omdat dit ‘n baie gesonde bestanddeel is om deel te maak van jul etes.

Nulaid het ‘n verskeidenheid eiergroottes wat dit ideaal maak om vir verskillende etes te gebruik. So kan jy groot of ekstra-groot eiers vir die viskoekies gebruik, of as jy eiers net wil hard kook en deel maak van ‘n kosblik, is ‘n ekstra-groot of jumbo-eier selfs ‘n groter porsie en dus vullender.

Onthou om nie eiers af te was nie. Die doppe is poreus en as jy dit was, kan enige onsuiwerhede maklik die eier binne dring. Vee dit liewer net af as dit regtig nodig is of gebruik ‘n eier met ‘n baie vuil dop so gou as moontlik. Onthou ook om in die warmer maande liewer eiers in die yskas te stoor, as teen kamertemperatuur. Die eiers sal beslis langer hou.

Het jy al gewonder wat die verskil tussen sardyne en sardientjies is? Wel, die een is eintlik net ‘n groter weergawe van die ander. In Afrikaans is dit ook redelik maklik om daardie afleiding te maak, maar aangesien verpakkings deesdae hoofsaaklik in Engels gedoen word, kan dit nogal verwarrend wees om te weet wanneer jy pilchards moet gebruik en wanneer dit eintlik sardines moet wees. Sardyne (pilchards) is die groter boetie van hierdie visspesie en sardientjies (sardines) die kleiner een. Daar is egter verskeie sub-spesies van verskillende groottes, maar hierdie gaan nie nou in ‘n biologieles verander nie, so ter wille van duidelikheid, onderskei ons net tussen sardyne en sardientjies.

Die ATKV se woord van die week vir #Kosblik, is dan juis sardientjies en sardyne. Dit herinner ons almal om net weer ‘n slag te onthou om die Afrikaanse benamings ook korrek te gebruik. ‘n Maklike manier om die verskil te onthou, is dat sardyne dikwels in tamatiesous in ‘n standaard-grootte blikkie verkoop word, terwyl sardientjies in ‘n heelwat kleiner, plat en reghoekige blikkie verpak word. Sardientjies word ook dikwels in soutwater of olie ingemaak en die blikkies het ‘n klein trekknippie om dit makliker oop te maak. Vroeër jare het hierdie blikkies se deksels met so ‘n metaalsleuteltjie oopgerol – kan jy dit nog onthou?

Soms verwys mense ook na sardientjies as Portugese sardyne of sardientjies en praat inderdaad dan van die kleiner weergawe van die heerlike vissies. Baie mense sal hul voortande gee vir ‘n snytjie warm roosterbrood met sardientjies op.

Resep

Maklikste viskoekies

Resep aangepas uit Cooking from the heart 1
Lewer 25 koekies

Bestanddele

1 x 400 g-blik sardyne in tamatiesous

2 wortels, grofgerasper

60 ml (¼ k) steengemaalde volkoringmeel

2 Nulaid groot eiers, geklits

125 ml (½ k) rou hawermout

60 ml (¼ k) blatjang of tamatiesous

60 ml (¼ k) gekapte vars kruie, soos Italiaanse pietersielie en koljander

5 ml (1 t) gemaalde koljander

15 ml (1 e) suurlemoensap

2,5 ml (½ t) sout

swartpeper na smaak

15-30 ml (1-2 e) olyf- of avokado-olie vir braai

Metode

1. Plaas die vis met die sous in die blik ’n groot mengbak en druk dit fyner met ’n vurk.

2. Roer die res van die bestanddele, behalwe die olie by en meng goed deur. Die beslag is redelik loperig. Geur na smaak.

3. Verhit ’n dun lagie olie oor matige hitte in ’n braaipan (’n AMC 28 cm Chef’s Pan werk uitstekend). Skep lepelsvol van die mengsel in die pan en braai vir 3-5 minute tot goudbruin aan die onderkant en effens gestol bo-op. Draai om en braai nog ’n paar minute of tot goudbruin en gaar.

4. Dreineer op kombuispapier en herhaal met die res van die mengsel en nog olie, soos benodig. Hou die viskoekies warm.

5. Sit vir aandete met slaai en groente van jou keuse voor. Of laat heeltemal afkoel en hou dit vir kosblikke.

 

Wenk

1. Gebruik sardientjies, in plaas van sardyne, as julle lief is daarvoor. Gebruik dieselfde hoeveelheid vis (sowat 3 x 120 g-blikkies) met die vloeistof. As die mengsel te droog is, voeg nog ’n eier of ’n bietjie water by.

Pin It on Pinterest

Share This