Subscribe for more recipes

Enter your email address to subscribe to this blog and receive notifications of new posts by email.

Roti

Aug 22, 2016 | Kosblik 101 / Lunch boxes

Kosblik 101

Spyskaart

Roti (resep uit Cooking from the heart) met oorskiet lamskouer in ‘n kerrie-en-suurroomsous

Pink Lady® gedroogde appels-tjips

Klein tamaties en komkommerskyfies

Neutemengsel

Deesdae is baie mense meer bewus van hul keuse van stysel vir ‘n ete. Dit is nie net ‘n mode-gier nie, maar beslis ‘n belangrike beginsel vir ‘n gesonde manier van eet. En dit is ook nie net belangrik vir diegene wat wil gewig verloor of diabete is nie – ons almal behoort daarna op te let. Ons het stysel in ons etes nodig, maar daar is definitief gesonder en minder gesonde opsies. Die eerste aspek om na op te let, is hoe verfyn en verwerk die produk is. Hoe meer geprosesseer, hoe meer van die natuurlike vesel is dikwels verwyder, wat beteken dat die stysel jou nie baie lank vol gaan laat voel nie. Dit sal ook jou bloedsuikervlakke redelik vinnig laat styg, maar ook weer net so vinnig laat val en jou honger laat voel. Hoe meer verfyn die produk is, hoe minder voedingswaarde is soms nog daarin oor. Daarom is onverfynde stysels en dié wat so na as moontlik aan hul natuurlike vorm is, heelwat beter om te eet. ‘n Paar voorbeelde is witbrood teenoor volkoring, witrys teenoor bruinrys, rou hawermoutpap wat jy self vir ‘n paar minute kook (nie eers die kitspakkies wat net kookwater bykry nie) tenoor enige boks-pap. Verwerket en verfynde produkte is dikwels ook baie hoog in suiker, sout of onnatuurlike preserveermiddels, wat ons liefs moet vermy. Nog ‘n rede om dit ‘n gewoonte te maak om etikette te lees.

As jy dan wel lusraak vir iets soos ‘n roti, soos wat in dié week se #Kosblik gebruik word, is dit die heel beste om dit self te maak. En dis glad nie sulke harde werk of soveel moeite nie – hier is ‘n maklike resep onderaan. Die rotis kan selfs vries, so maak genoeg vir ‘n aandete of twee en ‘n paar kosblikke. Jy kan ook ‘n gesonde olie kies om in die resep te gebruik, wat dit sommer nog gesonder maak.

Al hierdie aspekte, is dit waarop Cooking from the heart se resepte geskoei is en die hele konsep van die reeks resepteboekies gebou is. Pharma Dynamics as maatskappy glo regtig daarin om mense aan te moedig om ‘n gesonde leefstyl te volg, ook om te verhoed dat leefstyl-siektes hul later affekteer. Volg hulle ook op Facebook:  https://www.facebook.com/CookingFromTheHeartSA/

‘n #Kosblik moet altyd gebalanseerd wees en daarom is daar iets uit elke voedingsgroep nodig. Vir dié week se idees, is daar dus murgsagte stukkies lamskouer wat in ‘n ligte kerriesous gemeng en in ‘n roti geniet word. Daarmee saam ‘n paar groentes, neute om later aan te peusel en dan ‘n maklike appel-happie om ook self te maak. Ons noem dit sommer appel-tjips – dun skyfies Pink Lady® appels word in die oond uitgedroog, soos wat jy beskuit sal uitdroog. Dit neem net so bietjie meer as ‘n halfuur en is heerlik soet. Pink Lady® appels se bros tekstuur is ook ideaal, want die struktuur van die appel bly behoue, selfs al word dit uitgedroog. Die soet smaak bly ook behoue, wat dit juis ‘n lekker soet happie maak en beslis gesonder is as enige gekoopte happie. Jy kan dit deel maak van die ete, want die soet appel sal heerlik wees met die kerriegeure of geniet dit as ‘n peuselhappie deur die dag. Kombineer dit met die neute om die happie nog gesonder en vullender te maak. Die gesonde olies in die neute hou jou vol en ‘n belangrike deel van ‘n gesonde leefstyl.

Hierdie week is daar ‘n derde manier om oorskiet-lamsvleis op nog ‘n interessante manier te gebruik. Die hele idee is dat jy ‘n groot snit vleis gaarmaak vir ‘n ete en dit wat oorbly, dan weer aanwend vir ‘n kosblik. Die resep vir die gaarmaak van die resep is hier onder aangedui, met die idee om dit by ‘n eenvoudige kerrie-roomsous in te meng vir ‘n kosblik. Lamsblad wat lank en stadig met vloeistof in die oond gaargemaak geword, is heerlik sag, geurig en nog sappig. Pluis enige oorskiet-vleis en vries in porsies om vir kosblikke te kan gebruik. http://www.cookingwithlamb.co.za

Resepte

Rotis

Resep uit Cooking from the heart

Lewer 8 rotis

Bestanddele

250 ml (1 k) koekmeel

250 ml (1 k) volkoringmeel

30 ml (2 e) sonneblom- of avokado-olie

2,5 ml (½ t) sout

5 ml (1 t) gemaalde komyn (opsioneel)

250 ml (1 k) kookwater

10 ml (2 t) sonneblom- of avokado-olie vir braai

Metode

1. Plaas die mele in ‘n groot mengbak. Vryf die 2 eetlepels olie, sout en komyn met jou vingerpunte by die meel in, tot dit soos broodkrummels lyk.

2. Meng water by die meelmengsel en knie tot ‘n sagte deeg vorm.

3. Verdeel die deeg in 8 balletjie en rol elke balletjie in ‘n sirkel.

4. Vou die sirkel in die helfte en dan weer in die helfte en rol weer in ‘n sirkel. Herhaal met al die balletjies en bedek met ‘n skoon afdroogdoek tot gereed om te braai. Vir n perkefte ronde sirkel, gebruik die deksel van ‘n klein kastrol.

5. Verhit ‘n dun lagie olie oor matige hitte in ‘n groot braaipan. Braai roti aan eenkant tot dit begin pof. Draai om en braai tot goudbruin, maar nie hard nie.

6. Sit voor met ‘n kerrie van jou keuse.

Lamsblad in die oond

Lewer 6 – 8 porsies

Bestanddele

1 ui, gekap

2 wortels, in blokkies gesny

1 selderystingel, met die blare, gekap

10 takkies elk roosmaryn en tiemie

1,5 kg lamsblad

250 ml (1 k) rooiwyn

250 ml (1 k) sterk Rooibostee

sout en peper na smaak

Metode

1. Voorverhit die oond tot 160 °C. Plaas die groente en kruie in ’n groot kastrol met ‘n deksel wat in die oond gebruik kan word. Of gebruik ‘n groot diep oondbak en foelie as deksel.

2. Plaas die lamsblad bo-op die groente en skink wyn en tee oor. Geur met sout en peper.

3. Bedek met ’n deksel (of foelie) en rooster vir 3-3½ ure of tot die vleis sag is en maklik van die been gepluis kan word.

4. Haal die vleis van die been af en pluis in kleiner stukkies of sny in skywe vir ‘n maaltyd. Die gepluisde vleis is heerlik, teruggeroer in die groentemengsel in die kastrol. Vries enige orige vleis in porsies om as deel van ‘n kosblik te gebruik.

Wenke

1. Vir die perfekte gaarmaaktyd vir ’n baie groot lamsblad, sodat die vleis goed gaar is, maar nie droog nie, kan jy dit so bereken: 50 minute vir elke 500 g vleis, plus ‘n ekstra 50 minute, teen 160 °C gaargemaak.

2. Kerrie-en-suurroomsous met lam: Meng 125 ml (½ k) suurroom, 60 ml (¼ k) ongegeurde jogurt met 7,5 ml (1½ t) kerriepoeier of na smaak. Roer ongeveer 500-750 ml (2-3 k) lamskouer by en geur na smaak.

Pink Lady® appeltjips

Lewer 6 porsies

Bestanddele

2 Pink Lady® appels

Metode

1. Voorverhit die oond tot 120 °C. Plaas ‘n afkoelrak op ‘n bakplaat.

2. Sny heel apples, met die skil aan, met ‘n skerp mes in baie dun skyfies.

3. Pak skyfies in ‘n enkellaag op die afkoelrakkie. Droog die skyfies in die oond uit en laat die oonddeur met ‘n houtlepel oopbly. Die skyfies sal ongeveer 30-40 minute vat om droog te word, afhangend van die dikte van die skywe en hoe ver dit uitgedroog moet wees.

4. Bêre in ‘n lugdigte houer, vir 1-2 dae, want die tjips sal daarna weer sag word, afhangend van hoe ver dit uitgedroog is. Die appel-tjips is selfs mooi garnering vir kolwyntjies.

Pin It on Pinterest

Share This